SPDP Marudi Udah Sedia Napi PRN

BAKONG: Parti Demokratik Progresif Sarawak (SPDP) Marudi udah besedia napi Pengawa Bepilih Besai Nengeri (PRN) ke-11 ke disadang diatur dalam bulan March tauka April taun tu.

Nitih penerang dipansutka chalun parti nya ke deka bediri ba penuduk Kunsil Nengeri (DUN) Marudi, Datu Dr Penguang Manggil madah, sida udah numbuhka raban komiti ke deka nyaup bejalaika atur pengawa maya nya ila.

“Kami udah nyediaka diri ungkup pengawa bekimpin sereta ngundi.

“Kami udah numbuhka raban komiti pengawa bepilih nyengkuam raban ketuai pemadah, ketuai ngatur program, ketuai perengka perengka pengangkut, ketuai palan ngundi pelilih sereta iya ke bukai,” ku iya madah ngagai The Borneo Post kena Hari Enam tu tadi.

Ku Penguang nyaut tanya raban pemberita madahka nadai nanggul sida bekimpin ari rumah ke rumah laban mayuh palan deka dilawa, taja pengawa tu nyangka mar dikereja.

Kelimpah ari nya, sida mega deka bejalaika pengawa betemu mua enggau raban pengundi ba atur pengawa gempuru ke mit agi ari iya ke kala diatur dulu agi ari tu.

“Taja pia, kami enda ulih nagang mensia mayuh ti deka datai ngulu gempuru nya, nya kelai pengelurus ati enggau sukung sida ngagai parti,” pia ku Penguang.

Lebuhka ditanya, iya madah diri udah bejalai nemuai ngagai lebih 40 buah rumah panjai naka Hari Enam tu tadi.

Penguang mantaika jaku tu maya Pengerami Pemesai Begulai Enggau Rayat di Rumah Panjai Douglas Bungan di Sungai Temat, Bain Baru, Tinjar lalu pengerami nya bisi digulu urung 800 iku penyukung SPDP ke mega nyadi pengundi di sitak nya.

Sungai Temat, Bain Baru ngembuan penyauh urung tiga jam pejalai nengah jalai darat ari Pasar Miri lalu urung kira sejam setengah agi baru datai ba Rumah Panjai Douglas Bungan, kediuan 60 pintu ruang bilik.-Borneo Post