Sarawak pemadu beguna ngagai menua tu: Najib

BINTULU: Sarawak deka terus dikemansang nyadi sebengkah nengeri pemadu beguna di menua tu ukai semina ketegal iya besai tang mega laban ke ngembuan sitak pengawa bepilih besai kunsil nengeri enggau parlimen ke pemadu mayuh di menua tu.

Menteri Besai Datuk Seri Najib Tun Razak madah, iya deka meda Sarawak nyadi nengeri di baruh pegai Barisan Nasional (BN) ngundan mayuh peluang enggau pemansang dalam bidang ekonomi ke ulih nyaup ngenegapka perintah besai.

Ku iya, Sarawak nyadi Pemansut Kasar Asil Dalam Menua (KDNK) pemadu besai dalam menua tu.

Nya alai ku iya, penyuah pejalai nemuai ngagai nengeri Sarawak ukai semina rambau pengawa bepilih aja tang mega ketegal nyadi bakih Sarawak lalu baka nya mega Sarawak nyadi bakih perintah besai lalu sigi nyukung pangan diri.

“Pengulih Sarawak chukup besai nya alai pemisi perengka penyambung endang beguna amat. Nyema nadai perengka penyambung baka jalai raya, jematan, arus penyambung, bekal ai enggau karan tentu Sarawak tusah deka ngemansangka diri,” ku iya rambau Pengerami Pemesai Begulai Enggau Rayat di Padang Dewan Suarah kemari.

Iya madahka diri bisi juluk enggau perambu ke besai ungkup Sarawak dikemansangka begulai enggau perintah nengeri di baruh iring raban ketuai BN.

“Semina perintah BN aja ulih, tu ukai retorik politik, kitai udah mujur bejalaika pengawa lalu perintah besai deka neruska pengawa ngemansangka peranak Sarawak,” ku iya.

Ku iya, Jalai Besai Pan Borneo benung digaga ba renggat keterubah di jalai Simpang Nyabau nyentuk ke simpang Bakun penyauh 43.535 kilometer (km) nengah belanja RM578 juta lalu kesemua pemanjai jalai tu iya nya 1,000 km ari Lundu nyentuka Lawas beungkus RM16.4 bilion deka nyadi nyata enda lama agi.

“Pekara tu ukai jaku ditempa ngapa tang deka nyadi nyata seagi BN bekuasa, Jalai Besai Pan Borneo deka tembu lalu tu pulaika pemaik ngagai Sarawak,” ku iya seraya nambah agih belanja ungkup projek pemadu iya mar diberi perintah besai ngagai Sarawak.

Ku iya nandu, belanja ke diberi nya ungkup pemansang Sarawak lalu iya deka madah ngagai peranak Sarawak pun pemujur nya laban ngembuan juluk ke sebaka lalu sangkai ba adan ke sama iya nya deka mai Sarawak mansang sebaka enggau Semenanjung.

“Sebarang pemansang ke bisi di Semenanjung, Sarawak mega enda tau enda bisi pemansang nya. Sarawak enda tau enda ngasaika penyamai baka di Semenanjung. Jalai Besai Utara Selatan di Semenanjung bisi tol tang Jalai Besai Pan Borneo di Sarawak nadai tol.

“Enti sema Jalai Besai Pan Borneo mansa kandang menua pesisir, kitai deka meda Pan Borneo mai pemansang ngagai kandang menua nya lalu ngadaka peluang besai agi iya ke ulih nyungkak pengawa betanam betupi pengudah bisi jalai penyambung ke moden,” ku iya.-BP