JPJ Ngaga Operasyen Berengkah 29 Jun -13 Julai

KUCHING: Opis Perengka Pengangkut Darat (JPJ) ensanus, udah ngaga operasyen Hari Raya Aidilfitri berengkah 29 Jun nyentuk 13 Julai 2016.

Ketuai Bagi Penerit Adat Opis Perengka Pengangkut Darat (JPJ) Nengeri Sarawak Mohamat Johari madah ba sekumbang timpuh operasyen, mayuh strategi udah ditusun ngambika ulih nyapai juluk ke udah ditetap.

Ku iya, strategi dikearap ulih ngurang ikas bebadi di jalai alun sereta mega ngurang ikas pemati ba musin rami nya.

“Kitai mega keran nerenak pemereti bejimat maya bebai perengka pengangkut ngambika likun ungkup semua orang ti betengahka jalai alun,”ku iya ba seiti aum pengarang berita di Indu Opis JPJ Sarawak ditu, kemari.

Dikena nentu juluk nya dijapai, Johari madah JPJ deka neritka adat ngagai orang ti ngelanggar undang-undang jalai alun.

Kelimpah ari nya iya madah JPJ udah ngepunka pengawa meresa bas ekspres di depo bas kenyau 23 nyentuk 28 Jun tu tadi.

“Tuju kitai meresa iya nya ngambi ulih nentu tayar, brek enggau pekara teknikal bukai ba bas enda rusak sebedau ngepunka pejalai.

“Kitai mega deka meresa bas enggau ikas pengerai deriba ba 3 terminal bas iya nya di Kuching, Sibu enggau Miri lalu tetiap bas meseti bisi dua iku deriba enti pejalai nya ngelui 4 jam tauka 300 km,”ku iya seraya madahka pengawa nya deka dibantu ejensi Anti Dadah Menua (AADK).

Ba Ops Hari Raya Aidilfitri taun tu, Johari mega madah JPJ ngaga kerejasama enggau LPKP ngambi ulih nentuka tetiap bas nitihka pinta permit ke udah dikeluar nyengkaum tuju pejalai bas.

Ku iya, dua tim tauka dua iku staf JPJ deka ngaga diri lalu nepan bas ekpres ngambi ulih matau ulah deriba lalu nya mungkur pejalai ari Kuching ke Sibu lalu ke Miri.

Ungkup mutosikal, Johari madah empat operasyen deka dipejalai di serata menua iya nya berengkah 30 Jun (kemari), 3, 11 enggau 13 Julai.

Penyampau 226 staf JPJ deka bekereja ngemujur Ops Hari Raya Aidilfitri 2016 di serata nengeri.-UB