Pengawa KM Deka Baum Enggau Ketuai Dayak Disukung

SIBU : Pengempu tanah Adat Bansa Asal (NCR) ari Kanowit nyukung pengawa Kepala Menteri Datuk Patinggi Tan Sri Adenan Satem deka ngatur randau enggau bala ketuai Dayak pengudah pemisi Taun Baru berandauka pekara Pemakai Menua enggau Pulau Galau.

Chairman Serakup Peranak Pang Junan Ulu Ngemah, Entili Garaji madah pekara bekaul Pulau Galau enggau Pemakai Menua enda tau enda dikerandau.

“Kitai enda tau enda nemu Atur Tanah di Sarawak bebida ari Semenanjung Malaysia. Bisi bansa Melayu di Semenanjung Malaysia lalu di Sarawak kitai bisi bansa Dayak.

“Endang udah lama ditemu pemansut ke besai dalam pengidup asal bansa Dayak iya nya pengawa bumai betaun lalu sida bepanggai ba kampung ti ngemansutka pemakai baka dagin enggau daun babas,” ku iya madah ngagai The Borneo Post kemari.

Ku Entili, Pemakai Menua enggau Pulau Galau bansa Dayak udah diaku lebuh Sarawak agi ari baruh pegai koloni British.

Serakup tu ku iya, mantah pemutus Kort Federal kena 19 Disember ba Pemakai Menua enggau Pulau Galau dalam kes Tuai Rumah Sandah Tabau ari Rumah Sandah di Ulu Machan, Kanowit, sereta lapan iku pengempu tanah NCR ke bukai.

“Kami mega nyukung Sapit Menteri Pemansang Menua Pesisir enggau Kandang Menua Datuk Alexander Nanta Linggi ti madahka pemutus kort tu udah ngemaruhka bansa Dayak,” ku iya.

Chairman Serakup Pemansang Komuniti Sungai Kejungoh/Aya/Ayam, Sao Asing nganti gaya pemutus ari randau nya.

“Aku deka datai ngulu aum tu nyema sida bisi ngangau,” ku iya.

Iya ngansak bala ketuai Dayak ngiga chara dikena mutarka pekara nya tauka bala sida deka betapi enggau pengeringat bala rayat nyema sida puntan ngereja nya.

“Nya semina mai reti seiti aja ngagai kitai nyema perintah besai agi puntan ngaku hak kitai ba Pemakai Menua enggau Pulau Galau.

“Reti nya kitai nyadi kampar ba menua diri,” ku iya.-UB