Polis Sarawak udah sedia napi penusah ampuh bah

KUCHING: Polis Sarawak udah nyikap raban sida enggau kereban ke chukup dikena napi penusah ampuh bah ti dipelabaka nyadi di nengeri tu.

Nitih ku Sapit Komisionyer Polis Sarawak Datuk Abdul Aziz Yusof, bisi urung 2,000 iku raban enggau 168 aset disediaka kelebih agi ba kandang endur ke ditemu suah dituntung penusah nya.

“Kitai meda kandang menua pantai timur baka Kelantan enggau Terengganu udah berengkah ujan, nya alai di Sarawak, kitai udah minta semua KPD (Ketua Polis Daerah), kelebih agi di pelilih menua ke suah ampuh bah, ngambika nyikap diri,” ku iya.

Iya mansutka pekara nya lebuh dikerandau ba Pengerami Nyuaka Chek Tabung Amanah Warisan Polis (TAWP) ba Indu Opis Polis Kontinjen (IPK) Sarawak, ditu, kemari.

Ngenang pekara bukai, Abdul Azizi madahka polis nengeri tu deka suah agi matau raban nya dikena ngenukuka prosedur operasyen standard ( SOP) ke ditetapka nya dititihka.

Ku iya, Opis Integriti dan Pematuhan Standard mega udah ditumbuhka dikena nyaga pengawa meresi imej enggau narit pulai baru pengarap mensia mayuh ngagai institusyen nya.

Iya madahka tikas integriti raban polis Sarawak agi ba tikas ti manah lalu berebak enggau tu minta mensia mayuh datai ngeripot nyema bisi tetemuka raban nya ti bisi bekaul enggau kes makai suap, ngereja pengawa salah tauka salah ngena kuasa.

“Raban polis enda tau ngaga penyalah peneka diri sida. Sida mega baka rayat bukai lalu enti bisi ngereja penyalah, sida deka betapi enggau undang-undang ke udah bisi.

“Endang bisi ripot diterima tang ba tikas ti amat mimit. Enti kitai cherita pasal integriti di Sarawak, aku ngasaika iya ba tikas ke manah,” ku iya.

Dulu ari nya, Abdul Azizi nyuaka Chek Tabung Amanah Warisan Polis ngagai 26 iku penerima, seraya minta sesapa ke bedau minta bantu nya patut ngenataika peminta.

Bantu nya dibagi ngagai empat iya nya bantu Pemati, Bantu Mindah Kin Kitu, Bantu Berubat enggau Rengka Tubuh Palesu sereta Bantu Pelajar ke ulih dipinta pemesai enggau raban polis ke udah pinchin tauka orang ti nampung ruang bilik iya.

Kelimpah ari TAWP, Polis Sarawak mega bisi koperasi Polis Sarawak dan Tabung Kebajikan Sosial dan Rekreasi (TKSR) ti mega meri penguntung ngagai orang ti nyadi kaban koperasi baka bantu masuk sepital, bantu anak nyelai pendiau, bantu pemati enggau ke bukai.

“Taja pan penyampau bantu tu enda mayuh, tang abis nadai ulih mantu penerima awakka bisi dikena belanja dikena ninting hari tauka dikena meli kereban bantu enggau pelajar, lebih agi ke ditinggalka orang ti dikesayau,” ku iya.-BP