Rebut peluang nambahka pengelandik diri

KUCHING: Orang indu diperansang ngerebut peluang ngangkatka pengelandik diri dikena nambahka penatai pemisi diri tauka ruang bilik, nengah latih ke bisi disediaka perintah.

Menteri Muda Pelajar Tumu Nembiak Mit enggau Pemansang Ruang Bilik, Sharifah Hasidah Sayeed Aman Ghazali madahka, perintah bisi nyendiaka kus ungkup raban orang indu enggau nadai bebayar, ti bisi disediaka Wisma Wanita Training Centre (WWTC).

Ku iya, WWTC bisi nyendiaka empat bansa kus iya nya Kus Bejait Kreatif, Kus Pemajik, Kursus Spa enggau Urut lalu Kus Nyumai begulai enggau sekeda palan pengelandik ke diaku Opis Pengereja Pengawa (JTK).

“Perintah komited ba pengawa nyendiaka mayuh macham peluang dikena ngemansangka raban orang indu, laban semua nemu orang indu ukai semina ngenegapka sesebuah ruang bilik tang mega mantu nambahka penatai pemisi ruang bilik enggau menua.

“Nya alai, kitai ngarapka raban indu ngerebut peluang belajarka penemu tauka pengelandik ti baru ke bisi disediaka perintah nengah kus ti nadai bebayar, lalu ngemeranka penemu tauka pengelandik ke dipelajar nya dikena nambahka penatai pemisi ruang bilik.

“Ba taun 2016, WWTC udah mujur ngelatih sepenyampau 499 iku pesereta Kus Bejait Kreatif; Kus Pemajik bisi 806 iku; Kus Nyumai 805 iku enggau Kus Spa enggau Urut bisi 688 iku,” ku iya.

Hasidah ke mega Kaban Kunsil Nengeri (ADUN) Samariang mansutka pekara nya lebuh ke bejaku ba pengerami nutup ‘Kursus Asas Kecantikan dan Manicure Pedicure’ ke diatur Opis Orang Indu enggau Ruang Bilik Sarawak nengah kerejasama Indu N.7 Samariang ba Wisma Wanita ditu, lemai kemari.

Kus ke diatur sehari iya nya Kus Pemajik ti dipejalaika Akademi Kecantikan D’Zurainas enggau Kus Manicure dan Pedicure (Rafflesia Wellness Sdn Bhd dipasuk 70 iku orang indu ari sitak N.7 Samariang.

Tuju kus diatur endang dikena mantu ngangkatka pengelandik raban orang indu dalam bidang nya, kelimpah ari dikena ngelatih orang indu nambahka penatai pemisi ruang bilik.

Sama bisi datai ba pengerami nutup kus nya kemari, Menijar Rafflesia Wellness Sdn Bhd, Shahnida Eddie; Menijar Akademi Kecantikan D’Zurainas, Hadijah Bujang sereta Sapit Direktor JWKS Hasanah Bujang enggau Ketuai Raban Orang Indu PBB N.7 Samariang Hanifah Saed.-BP