Randau Perintah, Ketuai Dayak Dikearap Bisi Pemaik

KUCHING: Bagi nembiak Parti Rakyat Sarawak (PRS) ngarap asil randau entara Perintah Nengeri enggau raban ketuai Dayak ba sentang atur Pemakai Menua enggau Pulau Galau deka meri pemaik ngagai komuniti Dayak di Sarawak.

Ketuai Publisiti PRS, Kaunsilor Andy Lawrence madah, tanah bengkah pekara ke chukup berat ba pengidup komuniti Dayak lalu sebarang pemutus ba randau nya ila patut enda melakangka komuniti Dayak.

“Kitai ngarap ninga pemutus ke manah ungkup komuniti Dayak ba pemutus randau nya ila,” ku iya lebuh dirandau kemari.

Iya mansutka jaku nya lebuh ngenang sentang penerang Kepala Menteri Datuk Patinggi Tan Sri Adenan Satem ti deka ngadu randau begulai enggau raban ketuai Dayak ba bulan Januari ti deka datai pengudah pemisi taun baru.

Randau nya sentang pemutus Kort Federal bedau lama tu tadi ba sentang Pemakai Menua enggau Pulau Galau, kes Tuai Rumah Sandah Tabau sereta lapan orang bempu NCR ke bukai di Kanowit.

Andy mega madah raban nembiak PRS nyukung penerang ke dipansut presiden parti, Tan Sri Datuk Amar Dr James Masing ti minta Majlis Adat Istiadat Sarawak (MAIS) merambu ngagai Perintah Nengeri ngambi ulih nerangka enggau terang reti Pemakai Menua enggau Pulau Galau ke mengkang kabur.

“Ba taun 1997, MAIS bisi ngepun atur nerangka definisyen sentang undang-undang Pemakai Menua enggau Pulau Galau. Kitai enda patut ngetuka pengawa tu lalu pechaya enti dipajak belama tau mai asil tauka pemujur.

“Tu mih maya kitai patut ngangkatka isu tu ngagai renggat ke baru. Pekara ti dikedeka Presiden PRS iya nya MAIS patut enda dikemelakang ba isu ke bekaul enggau tanah NCR,” ku iya.

Ngenang pekara ke sama, Presiden Parti Bansa Dayak Baru Sarawak (PBDSB) Cubbold John madah Perintah Sarawak ti betuaika Adenan udah menang ba kort kes ngelaban bansa Dayak, Tr Sandah.

Pemutus Kort Federal sentang Pemakai Menua enggau Pulau Galau diasaika Cubbold baka ke muru bansa Dayak ke nyadi bansa asal arika nguan menua, ngembuan temuda, pulau galau enggau pemakai menua.

“Pemutus kort nya balat ngasuh komuniti Dayak di serata nengeri ringat.

“Sekalika Adenan beamat deka mantu, pengudah kort ngaga pemutus ti enda miakka Dayak (orang bempu tanah).

“Tauka iya (Adenan) semina deka nyelapka ati komuniti Dayak ti udah balat ensiban,”ku Cubbold seraya pechaya Perintah Nengeri bisi kaul enggau pemutus kort ke diletak kena 20 Disember 2016 nya.-UB