Mawan: Niang Adenan ketuai ti praktikal sereta ngemaruh diri

KUCHING: Kaban Parlimen Saratok Tan Sri William Mawan Ikom meri basa ngagai niang Kepala Menteri Datuk Patinggi Tan Sri Adenan Satem seraya madahka iya nya siku orang ke pratikal sereta ngemaruh diri.

Mawan ke mega presiden Sarawak Dayak National Union (SDNU) madah, iya nganggap niang Adenan siku pangan, ketuai enggau Kepala Menteri.

Niang Adenan ukai semina ngamatka jaku iya tang meda dekaka orang ke nyadi raban iya ngembuan penaluk, pia ku Mawan ke mega Kaban Kunsil Nengri Pakan.

“Iya amat ngemaruhka diri. Iya chukup berunding lebuh ngagai pemutus tauka konsensus. Sebarang pemutus digaga Kepala Menteri, iya enda besiping lalu batang pemutus ke digaga iya sebaka magang ba mensia mayuh. Aku deka ingatka iya ba pekara nya,” ku iya.

“Aku mega ngarika kami sebilik enggau SDNU, ngenataika penyinu ati ngagai sida sebilik ke lebih agi bini iya Datin Patinggi Datuk Amar Jamilah Anu enggau bala anak iya,” ku Mawan.

Adenan udah diberi Mawan enggau sida sebilik basa bejadi bup iya (Mawan) “Reflection – A journey of hope, aspiration and perserverance” kena 21 Sept ember taun siti nyin tadi di sebuah hotel ditu, ke alai sida belagu begulai siku penyanyi veteran Malaysia, Datuk DJ Dave, merindang emnsia mayuh ngena lagu Cliff Richard, “The Young One”.

Hobbi Adenan sebaka enggau engku lalu tu ngemudahka aku ingatka iya, ku Mawan.

Sebaka enggau Mawan, Adenan rindu nulis,belagu enggau bemain golf. Aku mega deka ingatka Adenan ti nyadi pangan iya bemain golf.

Ku Mawan maru, Adenan mega entara sekeda personaliti ti meransang iya tama politik. Mawan masuk arena politik lebuh ke beumur 20an.

Berebak enggau nya, kaban ‘trustee’ Yayasan 1Malaysia, Tan Sri Lee Lam madahka Adenan siku ketuai jelan iya pemaik sereta ngemeratka pekara bekaul enggau penyerakup ba pupu bansa.

Pemidang iya pengelenyau besai ke Sarawak, ku Lee.

Nyadi Kepala Menteri, Adenan udah ngemansutka penerang pasal pekara moderasyen, intergrayen sereta ngelaban ekstremis.

Ari baruh pegai pengelama dua taun lebih, iya udah ngiring Sarawak ngagai endur ke manah agi ari sukut pemansang.

Kuching udah diangkatka Yayasan 1Malaysia Bandaraya Penyerakup. Kuching bandaraya keterubah bulih status nya di Malaysia, ku iya seraya meri terima kasih ngagai Adenan laban nyukung inisiatif ngulihka Kuching nyadi Bandaraya Penyerakup.

Ku Lee, tebal agi rayat di Malaysia enda ngira bansa enggau jalai pengarap deka ngasaika pemidang Adenan.

Mawan seduai Lee pechayaka Adenan, 72, deka dilengau ketegal chara iya ti manah mutarka pekara bansa enggau jalai pengarap.-BP