KM: Sarawak Lenyau Siku Veteran, Ketuai Mayuh Peneleba

KUCHING: Kepala Menteri Datuk Patinggi Abang Johari Tun Openg madahka niang Tan Sri Celestine Ujang anak Jilan, 70, orang ke mayuh ngajar iya pasal dunya politik di Sarawak, kelebih agi maya nya Abang Johari baru deka masuk dunya politik, tang niang Ujang sigi udah enggau orang bepolitik dalam Parti Pesaka Bumiputera Bersatu (PBB).

Ku iya, pemidang Ujang udah ngujungka Sarawak lenyau siku veteran sereta ketuai ke mayuh peneleba.

“Ngarika Perintah Nengeri Sarawak, aku enggau rintai kabinet menteri ngenataika penyinu ati ngagai Puan Sri (bini niang Ujang, Puan Sri Elizabeth Pawa anak Edwin Ruggis).

“Niang entara siku orang ke dikumbai kami ‘great stateman’ ke mayuh udah (mantu Nengeri Sarawak. Aku empu kala gawa enggau niang dalam PBB sereta dalam opis perintah.

“Niang ukai semina ketuai tang bakih kami sereta orang ke sama gawa enggau kami, ti sama udah ngangkatka Sarawak begulai enggau ketuai bukai, nempa Sarawak baka ke diatu,” ku Abang Johari.

Iya madah munyi nya pengudah meri basa ke penudi ngagai niang, ba rumah niang Ujang di Jalai Urat Mata 1, Tabuan Jaya ditu, kemari.

Niang Ujang masuk politik maya umur iya ke agi biak lalu nyadi kaban kabinet nengeri dalam taun 1974.

Keterubah enggau orang bepolitik, iya menang ba Pengawa Bepilih Nengeri Sarawak.

Ujang kala mangku pengawa nyadi Menteri Nembiak, Lumba enggau Main, Speaker Kunsil Nengeri (DUN) lalu nangkan nya pulai baru ngagai kabinet.

Ujang talukka PBB taja pan kala napi penyarut dalam taun 1987 ke tebilang enggau sejarah ‘Ming Court Affair’, lebuh sekeda ADUN PBB ninggalka parti nya lalu begempung enggau parti baru, PERMAS, tang Ujang tetap enggau PBB.

“Niang udah bejalaika pengawa iya ngetanka perintah nengeri enggau PBB ba krisis dalam taun 1987, lalu iya mega mantu negap kelebih agi pengudah taun 1987,” ku iya.

Abang Johari ti mega Presiden PBB sereta chairman Barisan Nasional (BN) Sarawak, madahka niang Ujang mega kala nyadi Ketuai Nembiak, ke alai iya empu (Abang Johari) enggau Sapit Kepala Menteri Datuk Amar Douglas Uggah kala gawa ari baruh niang.

“Kami mayuh belajar ari niang ke nyadi siku ketuai, lalu nengah pengawa ke dipangku niang, mega udah ngelatih bala nembiak nyadi ketuai nembiak, nyengkaum aku empu ke kala nyadi sapit iya (dalam taun 1978).

“PBB beruntung endar laban bisi ketuai baka niang, negapka kami empu nyadi siti tim begulai enggau ketuai bukai baka ex-Sapit Kepala Menteri, Datuk Patinggi Tan Sri Alfred Jabu enggau sida bukai,” ku iya.

Ku iya baru, niang Ujang mega orang ke enda beratka diri empu laban maya niang berunding nyurutka diri ari dunya politik, nya ketegal meri awak ngagai orang baru nyadi Ketuai Nembiak PBB lebuh nya (1998).

“Ku Ujang, aku badu agi mangku pengawa tu laban meri awak ngagai bala raban bukai dalam BN numbuh perintah ke tegap, nya mih pemaik ti udah dikereja niang.

Sehari tu, kitai lenyau siku agi ketuai ke chukup manah sereta tegap. Kami ngenataika penyinu ati kami lalu ngarapka bala anak niang deka majakka pengawa apai sida iya, ku iya.

Niang mega kala nyadi Speaker DUN dalam taun 1982 nyentuk t aun 1987.

Niang midang kena Hari Tiga, di Hospital KPJ dalam urung pukul 7:40 malam pengudah dialisis di rumah sida empu ba Jalai Urat Mata Lurung 1, ke alai lemai nya mega iya madahka diri bisi berasai enda nyamai pendiau, sebedau ke nadai.

Niang ninggalka balu, Puan Sri Elizabeth Pawa anak Edwin Ruggis, enggau tiga iku anak indu, Marvina Ujang, Datin Angelina Ujang enggau Dr.Priscilla Midah Ujang.

Ujang kala nyadi ADUN Kemena pengudah menang ba Pengawa Bepilih Kunsil Nengeri nyadi chalun BN ba taun 1974 nyentuk ke taun 2001.

Niang kala mangku sekeda portfolio dalam Kabinet nengeri baka Menteri Adat Pesaka, Nembiak, Lumba enggau Main (1974-1974), Menteri Pengawa Berumah (1980-1981)enggau Menteri Pemansang Tanah (1988-1994).

Sebedau masuk politik, niang kala mangku pengawa nyadi pemesai pengatur pengawa ba opis perintah ari taun 1966 datai ngagai 1973.

Niang mega kala mangku pengawa nyadi Mandal Presiden sereta Ketuai Nembiak PBB sebedau ninggalka dunya politik dalam taun 2001.

Pengudah nya, niang bejalaika pengawa dagang ke alai iya lalu nyadi Penyanding Penemu Presiden Dewan Dagang enggau Industri Dayak (DCCI).

Niang deka dikubur ba Nirwana Memorial Park Jalai Batu Kitang kena Hari Enam tu.-Utusan Borneo