Mayuh Raban Nembiak Bedau Ngerejista Ngundi

KUCHING: Kurang penyedar sentang pemesai guna sereta hak nyadi pengundi engka entara kebuah raban nembiak rebak baru ke beumur entara 21 taun ngagai 39 taun enda ngerejista diri nyadi pengundi.

Direktor Komiti Pengawa Bepilih Besai (SPR) Sarawak Datu Takun Sunggah taja pia madahka pansik silik bedau ulih digaga lebih agi ungkup Sarawak.

Taja pia, selalu iya, maya musim pengerami penyampau sida ke ulih ngundi bisi nambah ari selama.

“Pekara tu tusah deka ditentu laban bisi mega sida ngerejister diri maya umur 40 taun.

“Lalu penyampau nya deka betambah ninting taun rambau pengawa bepilih besai,” ku iya lebuh ditanya pasal penyedar ba raban nembiak rebak baru ba nengeri tu ke ngerejister diri nyadi pengundi.

Takun taja pia enda ulih meri penerang silik bekaul enggau demografi pengundi berejister ba Sarawak laban maya dirandau iya benung ba Shah Alam bisi pengawa diatur.

Ditanya pasal Rejister Pemilih Tambah Suku Taun (DPT/ST) ke deka diguna maya Pengawa Bepilih Besai (PRU) Ke-14 diatur March tu, iya melabaka engka DPT/ST kepenudi taun 2017 iya nya kena 31 Disember 2017deka diambi.

“Taja pia, nyema rejister pemilih tambah ba Sarawak ‘ok’ tang ba Semenanjung Malaysia enda, nyadi nya bedau sah ungkup Sarawak.

“Reti nya pemutus ditentuka SPR indu opis lalu rejister pemilih nya patut digaga ba selampur menua...Taja pia penerang rasmi deka dipansutka SPR indu opis maya udah datai jam iya ila,” ku iya.

Iya madah naka 30 November 2017 urung 1,211,108 pengundi berejista udah digazet ba Sarawak.

Udah nya naka 30 Jun 2017, urung 14,622,881 rayat menua tu udah berejister nyadi pengundi. Taja pia urung 3,797,785 rayat Malaysia ke beumur 21 taun ke atas lalu udah ulih ngundi ditemu bedau ngerejista diri.-Utusan Borneo