Anang Bergedika Pangan Diri, Tegapka Penyerakup Taja Pan Bebida Penemu- Abdullah.

KUCHING: Ketuai Sekretari Politik Kepala Menteri, Abdullah Saidol madahka ulah bergedika pangan diri ketegal bebida penemu enggau runding semina deka mecahka penyerakup ke udah lama digenggam ti nyadi penentu pengelikun enggau pemansang Sarawak.

“Pebasa penyerakup kitai di Sarawak laban penyerakup pekara ti besai reti. Enti enda pia, pedis kitai deka nyapai pemansang baka ke dipeda sehari tu.

“Anang begedika pangan diri taja pan penemu enggau runding kitai enda sebaka laban semua kitai tu anak nengeri Sarawak,” ku iya. Jaku nya dipansutka iya maya pengerami mantar gawai Tikas Pelilih meradong ba Dewan Christus Lumen Mindi Bintangor kena ka malam ensanus.

Pengerami ti diatur Gerempung Tuai Rumah Meradong,SIDS enggau SDNU,lalu ga bela sida Sapit Menteri Pemansang menua Pesisir enggau Kandang Menua Dato Alexander Nanta Linggi sereta ADUN Daro, Murni Suhaili.

Abdullah ke mega ADUN Semop madahka rayat Sarawak ti diarika mayuh macham bengkah pupu raban bansa nengah ka batang pengarap sereta runding ti berbida udah nentuka nengeri tu chukup kaya enggau adat sereta main asal dikemisi, udah nya Sarawak pan chukup nyelai enti dibandingka enggau nengeri bukai. 

Iya meri chunto ka diri iya ti nyadi Sekretari Politik Kepala Menteri enggau ADUN enda ga bepilih bansa ba pengawa meri servis ngagai rayat, udah nya iya pun nambahka jaku iya pechaya semua ADUN enggau Sekretari Politik bukai pan seruran meri servis ngagai rayat lalu servisnya dipejalaika enda ngira bansa enggau jalai pengarap.