Penyerakup dalam BN harus dikemeratka- Minos

KUCHING: Sesapa ka setuju enggau penemu nerima ka Parti Tenaga Rakyat Sarawak (TERAS) ti deka masuk ka dalam parti Barisan Nasional patut berunding dedalam , laban iya beratika pekara ti ka besai agi iya nya penyerakup dalam BN, ku Dato Peter Minos pemerati politik.

Iya madah ka diatu udah dipeda baka bisi ga sekeda orang ti rindu ke penyarut ti majak nyadi dalam BN nengah ka chara mejal sereta nyekat ka sebarang singkang kena nyerakupka BN ti besebutka pasal atur sereta nyerungkai pekara lama udah nya lalu nempa isu kena mambarka penyerakup.

Iya nambahka agi, penemu orang ti nyekat parti baru nya masuk kaa gerempung BN enda diingatka diri empu bisi kaul enggau parti lebuh penyakal bebendar ngelaban BN.

Ketuai BN nerima ka orang ti enda rindu ke BN tang masuk ke BN laban deka nyerakupka kaban politik dalam BN. Fikir meh kati gaya enti sema meh BN nambitka pintu sereta enggai nyendia palan enggau sida, tauka nya dikumbai berakup? Sigi agi kati ka gaya enti meh ketuai BN ngembuan asai ati deka malas dendam ketegal pekara ti udah nyadi suba?

Tu meh maya kaban BN bergempung ari baruh BN, lalu pekara tu mesti dikemeratka. Iya ga enda nemu nama kebuah orang enda ulih berati pekara ke besai agi sereta meri awak ngagai chairman BN Sarawak BN Tan Sri Datuk Amar Adenan Satem ngaga inisiatif ngempung BN.

Ku iya, penyerakup nya beguna amat laban enti nadai penyerakup, bala kaban enda bebasaka ketuai ti dekaka penyerakup. Penyerakup meh ke nanggam kaban dalam parti tauka perintah champur baka BN, laban enti nadai asai ati deka berakup, parti nya pan deka punas dudi ila.

Ku iya, Adenan dipeda udah bebendar amat deka nempa penyerakup dalam BN, beri mih iya peluang nempa penyerakup dalam BN. Endang udah tanggungpengawa Chairman BN Sarawak mutarka penyarut ke nyadi dalam BN, sereta ngempung BN.

Tanggungpengawa nya berat sereta mar, nya alai enti kitai endang amat taluk ke BN, kitai patut bebasaka chairman BN ke minta kitai berakup. Minos nambah BN Sarawak deka betapi enggau pemar enti peminta iya enda dikeibuhka.

Uji perunding memanah, ngetu beserekang penemu sereta pendingka jaku ketuai kitai. Chairman BN enda bechiping ati sereta enda ibuh ke pekara ti enda menuku dalam politik sereta deka ngumpul pengering dalam BN.

Enti penanggul ke diatu majak nyadi, penyakal rerakah ketawa lalu deka menang ba sekeda penuduk BN maya pengawa bepilih dudi tu ila. Ya madah pekara ti patut seruran dikeingatka kaban BN, sekalika nya pekara mit tauka besai.