PBB Baram patut chakah ngereja pengawa: Dennis

MARUDI: Semua pampang tauka pati mit Parti Pesaka Bumiputera Bersatu (PBB) di Baram diperansang bejalaika atur pengawa ti ukai semina nguntungka kaban parti nya aja tang mega peranak menua dikena ngenegapka kaul sereta kerejasama antara parti nya enggau rayat dia.

Nengah atur pengawa nya, sida ulih meri penerang ke betul ngagai peranak menua nya ngambika sida bulih penerang ke betul ari perintah Barisan Nasional (BN).

Kaban Kunsil Nengeri (ADUN) Telang Usan Dennis Ngau madah, nengah atur pengawa ke baka nya pampang mit parti nya ulih begempung enggau parti komponen BN bukai baka SUPP, PRS enggau SPDP nyerakupka peranak ba kandang menua sida lebih agi raban bansa Orang Ulu di Baram.

“Nya alai aku muji pengawa ti dipejalaika pampang mit PBB Long Lama Ili ke patut nyadika chunto pampang mit PBB bukai ditu ti tau pulaika pemaik ngagai parti enggau rayat,” ku iya.

Dennis bejaku munyi tu lebuh bejadika Pengerami Ketuai Begulai enggau Rayat ke diatur Pampang Mit PBB Long Lama Ili, di Long Ikang.

Berebak enggau nya, Dennis minta rayat di Telang Usan nyendiaka diri ngerebut peluang dalam ekonomi nengah pengawa numbuhka Pasar Baru Telang Usan ila ke mungkur kandang menua berengkah ari Long Julan nyentuk ke Long Apu.

“Pelin besai Pasar Baru Telang Usan tu ila manah amat laban deka mai mayuh pemansang nyengkaum peluang ekonomi ngagai menua Baram,” ku iya.

Beserimbai enggau pengerami nya, Dennis lalu ngungkupka geran RM5,000 ari perintah ngagai Gerija Long Ikang, RM5,000 agi ungkup Serakup Apai Indai enggau Pengajar Genturung Pendiau Long Ikang sereta dua buah injin pengisar padi.

Dulu ari nya, Ketuai raban bansa Orang Ulu Pelilih Miri Temenggung Elizabeth Deng lebuh bejaku besemaya deka ngabas kandang menua ke ari baruh pegai iya pemadu nadai pan dua kali dalam sebulan enti sema nadai penanggul bukai.

Ku iya, kandang menua baka Long Ikang, Long Banyok enggau Uma Akeh mega ari baruh bidang kuasa iya, nya alai endang nyadi tanggungpengawa iya ngabas kandang menua nya.

Bela bisi ngulu pengerami nya, Pengulu Herbert Lawai Epoi, Pengulu Theadus Lenjau Kuleh enggau mensia mayuh bukai ba kandang menua nya.-BP