Perintah Sarawak Ngemeratka Bidang Teknikal

KOTA SAMARAHAN: Perintah Sarawak amat ngemeratka bidang teknikal dikena nyungkak menua tu ngagai tikas maju sereta bepenatai pemisi tinggi ba taun 2030.

Menteri Muda ba Opis Kepala Menteri (Pemansang Orang Dagang Bumiputera) Datuk Mohd Naroden Majais madah, pemayuh Palah Pelajar Tinggi (IPT) sekalika perintah tauka peribit ti nyediaka bidangka teknikal amat senipak enggau juluk nya.

“Dalam konteks Sarawak, pelajar sereta pengelandik dalam bidang teknikal amat dikemerat sereta diperansang perintah negeri ngambika ulih nyungkak nengeri tu ngagai tikas maju sereta bepenatai pemisi tinggi ba taun 2030.

“Nya alai perintah mekuh ngagai bidang teknikal, ti ukai semina dikena napi peminta guna pengereja pengawa ba SCORE tang ulih nyamin Sarawak nyadi lebih maju jemah ila.

“Sarawak untung laban ngembuan beberapa IPT di nyendia sereta ngajar nembiak dalam bidang teknikal baka UNIMAS, UiTM, Swimburne, Curtin enggau mayuh kebukai di serata menua tu, nengah IPT nya Sarawak ulih nempa modal mensia teknikal senipak enggau juluk dekaka Sarawak nyadi ‘hub ilmu’ ba rantau tu,” ku iya.

Naroden ti mega Menteri Muda Pengatur Pemansang Pengeraja Asal mansutka pekara nya lebuh bejadika Majlis Perasmian Program Engineering Week 2014 ke diatur Fakulti Kejuruteraan ba Dataran Fakulti Kejururteraan UNIMAS ditu, kemari.

SCORE enggau Halal Hub di kandang menua tengah Sarawak deka nyadi hub kereja ngagai sida ti bepengelandik tinggi ke ulih mai ngagai pemansang menua jemah ila,tu sebengkah ari strategi perintah muka peluang ngagai rebak baru enggau dudi, ku iya.

Ngenang bidang injinia iya madahka, bidang injini sebengkah bidang injina ti benung ngerembai sereta ukai semina bekaul enggau rumah, jalai alun, perengka pengangkut sereta mesin aja tang mayuh pekara bukai.

“Bidang injinia sebengkah bidang profesyenal ti benung ngerembai sereta diperatika diatu chukup mayuh peminta ngagai bidang tu.

“Sekeda orang ti enda nemu melabaka bidang injinia tu semina mekuh ngagai rumah, jalai alun, penrengka pengakut enggau mesin aja, kebendar bidang ti mungkur pekara ti besai baka kejuruteraan awam, kejuruteraan mekanikal, kejuruteraan kimia, kejuteraan elektrik enggau mayuh kebukai,” ku iya.

Kelimpah ari nya Direktor Program Engineering Week 2014 Syed Muhammad Hamdi Syed Ahmad lebuh bejaku ba pengerami nya madahka program nya diatur ninting taun kenyau ari taun 2011 ke diatur IEM-SAFE UNIMAS Student Section, nyerumba National Engineering Week ke dipejalaika Institut Jurutera Malaysia (IEM).

Iya madahka program nya kolaborasi entara Fakulti Kejuruteraan UNIMAS, IEM Sarawak Branch enggau IEM G & S Sarawak Branch dikena meri kelala IEM-SAFE Student Section ngagai raban bansa lebih agi mahasiswa, lecturer enggau pengereja pengawa UNIMAS.

“Kolaborasi tu sebengakah platform beguna ke ulih mai mahasiswa Fakulti Kejuruteraan UNIMAS ngagai industri tauka oranisasyen luar enggau semak agi.

“Program ti diatur 8 ngagai 12 Oktober ti ngena rambai jaku Explore the Future, tuju iya dikena meri penerang silik ti ukai semina ngagai raban mahasiswa Fakulti Kejuruteraan aja tang mega nyerangkum fakulti bukai enggau orang mayuh pasal teknologi moden dalam bidang injinir kemaya hari tu.

“Tuju porgram tu mega dikena ngangkatka pengelandik mahasiswa nengah program entrepreneurship sereta ulih nempa bakal injinia ti bepengelandik tinggi,” ku iya. seraya madahka entara aktiviti ke dipejalaika baka autoshow, icon engineers, islamic day enggau Ustaz Don Daniyal Don Biyajid ti betajuk ‘The Secret of Furqan: Islam, Science and Technology’, hari pemeri, futsal enggau ke bukai.-BP