Bandaraya Penyerakup nadai kurang digusung temuai, ku Abang Johari

KUCHING: Kuching dikelala enggau nama Bandaraya Penyerakup, kelai ngembuan bepengeraja dalam mayuh macham adat pesaka sereta ulih beserakup enggau pangan diri taja dikembuan mayuh macham pupu bansa.

Menteri Dagang Temuai Datuk Amar Abang Johari Tun Openg madah, Sarawak patut dikelai nyadi sebuah menua ke bepengeraja enggau mayuh macham adat ari mayuh macham pupu bansa, tang ngembuan rayat ke ulih idup likun eng-gau pangan diri.

“Tu penuduk ke nguntungka kitai dalam Malaysia. Di Semenanjung Malaysia, sida din beserekang penemu, sekeda ngumbai diri Mirah, sekeda Kuning… tang kitai ditu mengkang Gadung laban ati kitai gadung!

“Nya alai, tan ke penyerakup kitai nya, kelimpah ari ngetanka rampa menua sereta komuniti kitai, laban kededua tu sama nying-kang, lalu nyadi pemerat ke unik,” ku Abang Johari.

Iya madah munyi nya lebuh bejadika ‘Borneo Talk Priviledge Card’ di sebuah hotel antarabansa ke mega digulu Menteri Muda Dagang Temuai Datuk Talib Zulpilip, Sekretari Mendam Opis Menteri Pengawa Dagang Temuai (MOTS) Datu Ik Pahon Joyik enggau ‘Editor-in-Chief’ bup Borneo Talk, nyengkaum industri dagang temuai di menua tu.

“Pemerat kitai nyaga rampa menua kitai ke agi gadung, laban ngelama tu pan, kitai betatika pengawa kitai nyaga rampa menua tu,” ku iya.

Kelimpah ari nya, iya mega madahka manggai taun baru tu ila, mayuh aum besai renggat antarabansa deka diatur di Sarawak, kelebih agi laban menua tu ke bepengeraja enggau rampa menua, ke narit ati mayuh orang ke deka datai baum ditu (di Sarawak).

“Minggu baru tu ila, aku deka ke Argentina, Buenos Aires. Aku deka mai bup ‘Borneo Talk ‘enggau kami kin, laban bup tu tau meri kelala ngagai mensia mayuh ke ngagai aum antarabansa nya ngelala Sarawak enggau semak agi,” ku iya.

Abang Johari ti mega Menteri Pengawa Berumah madah, iya enggau raban opis menteri sida iya deka ngena penegap Sarawak sebuah menua ke bepenyerakup ari mayuh macham pupu bansa sereta pengarap, tau nyadi sebuah menua ke unik di Malaysia.

“Laban pelaba aku nadai agi menua dalam dunya tu ke agi bepengeraja enggau rampa menua, mayuh macham pupu bansa ari mayuh macham pengarap ke ulih diau begulai enggau manah eng-gau pangan diri,” ku iya nandu.

Abang Johari mega ngarapka bup ‘Borneo Talk’ tu ukai semina tebilang di Sarawak aja, tang nyangka pengeluar bup tu mega tau nyengkaum menua bukai baka Brunei, Sabah enggau Kalimantan.

“Iya tau nyadi kerejasama lebuh kitai ngangkatka ASEAN nyadi sebuah komuniti, nyengkaum ngangkatka BIMP-EAGA nyadi sebuah penyangkai. Kelimpah ari nya, Abang Johari madah, sentang penatai temuai ngagai Sarawak naka kediatu (bulan Ogos) udah nyapai 3.1 juta.

“Taja pan, sekeda sitak menua dalam Malaysia enda entu mujur dalam dagang temuai sida iya ketegal ari mayuh macham penanggul, tang di Sarawak, kitai agi mujur teulihka pemayuh nya,” ku iya lalu ngarapka datai ujung taun tu ila, penyampau nya deka nambah ngagai 5 juta.

‘The Borneo Talk Priviledge Card’ ti diberi besereta enggau bup ‘Borneo Talk’ meri penguna diskaun ngagai sekeda palan bebeli barang ungkup temuai, ke tau dibeli ba urung 50 kedai di Bandaraya Kuching tu.

Antara kedai ke nerima diskaun ngena kad tu nyengkaum GNC, Bus Asia, Sarawak Cultural Village, Kuching Specialist Hospital, Normah Medical Specialist Cen-tre, Damai Beach Resort, ChaTime, Imperial Garden Restaurant, Lea Centre & Lea Sports Centre, Restoran SCR enggau mayuh palan bukai.-UB