Kes bebadi di jalai alun nambah 6.65% nyentuk 17 Nov ba timpuh sebaka taun 2014

KUCHING: Statistik penusah bebadi ba jalai alun ti dirikod Polis Diraja Malaysia (PRDM) Kontinjen Sarawak entara Januari nyentuk 17 November 2015 ngayanka kes nya nambah 6.65 peratus tauka 1,033 kes, dibandingka enggau timpuh ke sama taun 2014.

Komisyener Polis Sarawak Datuk Seri Muhammad Sabtu Osman madah, dalam timpuh nya bisi 16,573 kes penusah bebadi dirikod enti dibanding semina 15,540 kes dalam timpuh ke sama taun nyin kemari.

Berindik ari pekara nya Sabtu ngelalau mensia mayuh ngambi ngemeratka pengelikun diri ba jalai alun lebih agi maya pulai kemisi Hari Krismas ke deka datai.

“Bepelasarka statistik kes bebadi jalai alun Kontinjen Sarawak ari semua kes ke dirikod berengkah Januari nyentuk 17 November 2015 (17,573 kes) ti ngirauka kitai iya nya penyampau mati maya penyadi nya bisi 380 kes dibandingka semina 377 kes dirikod dalam timpuh ke sama 2014.

“Ke ngenyinuka ati kitai iya nya kes pemati tu, taja pan semina nambah bida 3 kes tauka 0.80 peratus aja.

“Nya alai aku ngarapka semua raban bansa beratka pengelikun diri lebuh ba jalai alun, enda ngira kini tunga tauka penyauh pejalai anang enda beratka seput diri, sayau meh ke nyawa diri sereta diri sebilik,” ku iya.

Sabtu mansutka pekara tu lebuh dirandau pengarang berita pengudah pengawa nyerahka 52 buah kereta MPV baru Proton Inspira 2.0 ti diatur ba Padang Kawad, Indu Opis Polis Kontinjen Sarawak ditu, pagi kemari.

Nambahka nya, bisi dirikod ari penyampau semua kes dalam timpuh ke sama kes mati tekalanya ba penusah bebadi jalai alun ngerikod penurun iya nya 343 kes mati tekala nya (Januari – 17 November 2015) enti dibandingka semina 346 kes dalam timpuh ke sama.

Beduduk ari pekara nya Sabtu madahka diri seruran minta pemesai chakah agi bejalaika pengawa nginau ba jalai raya.

Ari nya kes penusah bebadi ba jalai alun ulih dikurangka, ku iya.

“Aku minta semua pemesai bejalaika pengawa nginau jalai alun ngambika ulih ngurangka penyampau kes bebadi mai nyawa di jalai alun,” ku iya seraya madahka kes pengawa jai di Sarawak dalam timpuh ke sama mega ngayanka penurun, iya nya 14.12 peratus.-UB