KM: Fokus pemansang ba kandang mengeri ngemeratka kualiti pengidup mensia mayuh

KUCHING: Arus pemansang di Sarawak maya ke diatu ngemeratka fokus pemansang ba kandang mengeri kena nyapai penegap kualiti pengidup mensia mayuh.

Kepala Menteri (KM) Datuk Patinggi Tan Sri Adenan Satem madah pengawa nya dikemujur nengah chara ke pemadu engkeman nyengkaum pekara ke pemadu berat dalam nentuka kualiti pengidup rayat tinggi agi.

“Pekara nya mungkur atur nyendiaka perengka guna ti chukup, ngintu rampa menua enggau manah, nentuka tikas pengelikun dalam mengeri tinggi sereta guna ngemansang pekara rama enggau main asal,” ku iya.

Adenan mansutka jaku tu rambau bejadika Licha ‘Towards Socially & Culturally Vibrant Cities & Towns ungkup Zon Selatan ba sebengkah hotel ditu, kemari.

Teks jaku iya dibacha Menteri Pengawa Berumah enggau Dagang Temuai Datuk Amar Abang Johari Tun Openg ti datai ngarika iya.

Konsep ‘ Cities for Peoples’ ke nyadi sebengkah konsep berat ba pemansang mengeri di serata dunya ku Adenan entara sekeda ke ditunda Sarawak.

Nengah konsep nya, iya madah ejensi ke bekaul deka bejalaika tanggungpengawa ngemansangka mengeri setipak enggau penyampau mensia ke alai pemaik rampa menua mega bela dikemerat.

“Atur mega begunaka teknik ke kreatif kelimpah ari nyendiaka polisi enggau nguna teknologi moden ke dikemisi maya ke diatu.

“Arus pemansang mega begunaka ubah ba chara genap iku orang berunding ke alai komuniti megai tanggungpengawa nyaup ngelengkas proses pemansang,” ku iya.

Licha dua hari berunggu berengkah 19 nyentuk 20 November 2015 nya matak lebih 400 iku orang ari empat pelilih menua tunga Zon Selatan.

Bela datai Menteri Muda TanggungPengawa Raban Bansa Datuk Peter Nansian Ngusie, Menteri Muda Pemansang Perengka Guna Datuk Daud Abdul Rahman, Sekretari Mendam Opis Kaunsil Kandang Menua enggau Pemansang Komuniti Datu Dr. Penguang Manggil enggau Menijar Besai AZAM Sarawak Rosalind Yang Misieng.-UB