Pemutus 12 iku profesional Dayak tama DAP enda ngusak penegap BN

KUCHING: Parti Tenaga Rakyat Sarawak (TERAS) ngasaika ulah 12 iku profesional Dayak ti nyadi kaban Parti Tindakan Demokratik enda ngeruga penegap Barisan Nasional (BN) nengeri.

Mansutka penemu nya, Sapit Presiden Datuk Peter Nansian madahka rayat nengeri tu udah chukup peneleba mida ketuai ti amat deka nulung rayat, ke alai ketuai ari BN sigi mengkang dipilih.

“Kitai enda ulih nagang pengeran sesiku orang deka bediri minta pilih ba tetiap pengawa bepilih.

“Raban ketuai sigi sama bela ngintu pendiau, penegap parti diri. Rayat ke nyadi pengundi ngembuan hak milih chalun ti tau meri servis enggau engkeman nitihka pinta enggau peneka sida,’ ku Nansian.

Nyakal ulah 12 iku profesional tau ngeruga penegap BN, Nansian ke mega ADUN Tasik Biru madah BN ngembuan rikod manah ba atur nyendia servis ngagai rayat .

Ku iya, rayat diatu udah chukup pintar milih pengari ke pemadu manah.

Kena 1 November 2015 tu tadi, raban profesional Dayak ti diuluka Paul Raja (seiku luyar) nyengkaum Richard Lias, Philip Tero, Baba Emperan, Ali Basah, Frankie Bedindang, Douglas Alau, David Kalom, Granda Aing, Robert Tella, Edward Agong enggau Gabriel Ajan Jok ngerijista diri masuk DAP Sarawak.

Pengawa sida sehari nya besaksika penyanding penemu DAP menua Lim Kit Siang enggau Chairman DAP nengeri, Chong Chieng Jen ke alai sida pechaya ulih ngeringka DAP ba kandang menua pesisir.

Ngenang kaul bukai, Nansian madahka TERAS mengkang ngining sekeda sitak DUN baru, ari 11 iti ke dikemendar Komiti Pengawa Bepilih bedau lama tu tadi.

“Kitai pechaya ketuai BN deka ngaga pemutus ti manah ba sentang agih penuduk tu. Semua pemutus dilempai ba ketuai BN ke alai sida sigi deka meri ngagai parti ti ulih mai pemujur ngagai BN.

“TERAS enda ngansak diberi tang pechaya BN ulih ngagih enggau manah laban TERAS sigi deka ngaga kerejasama enggau parti dalam serakup BN,’ku Nansian nandu.

Nansian mega madah Datuk Sylvester Entrie deka bediri ngenanka DUN Marudi munyika jaku ti dipansut Kepala Menteri ba sebengkah pengerami di Marudi bedau lama tu tadi.

“Kelimpah ari nya Paulus Palu Ngumbang mega deka ngenanka sitak Batu Danau, Rossey Yunus ngenanka Bekenu, presiden (Mawan) ba Pakan.

“Aku mega udah ditelai kepala menteri ngenanka sitak DUN aku, Tasik Biru,’ku iya.-UB