Pemutus Ngaga Tekat Ai Baram Agi Digantung

KUCHING: Naka ke diatu perintah nengeri bedau ngemutus bejalai tauka ngemansangka projek tekat ai Baram nyentuk semua piak setuju.

Kepala Menteri Datuk Patinggi Tan Sri Adenan Satem madah, berindik ari mayuh piak nyengkaum peranak menua nya enggau gerempung ukai dikuasa perintah (NGO) ti enda besetuju tauka mantah projek nya dipejalaika.

Iya madah, pemutus enda bejalai tauka ngemansangka projek nya mega dikena bebasaka pemutus peranak menua dia.

“Naka ke diatu kitai enda bejalai tauka ngemansangka projek Tekat Ai Baram, sekalika pemutus nya tetap tauka enda, nganti notis baru udah tu ila.

“Mayuh macham bantah ari peranak kandang menua nya, enti kita enggai au ga, nitih peneka tauka pemutus kita.

“Tang enti sema kita enda ngasaika penguntung pemansang bepun ari projek nya enda dipejalaika, kita anang nyalah aku tauka perintah,” ku iya lebuh dirandau raban pengarang berita kemari.

Dulu ari nya Adenan ngulu sereta bejadika Hari Perkhidmatan Awam 2015 ‘ Leadership Taking Charge: Make a Difference’ ti diatur Perintah Nengeri enggau Opis Sekretari Perintah Besai Nengeri Sarawak di BCCK ditu.

Lebuh ngenang pasal tekat ai Baram maya bejaku ba pengarami nya, Adenan mega madah, perintrah nengeri deka neruska pengawa bejalai tauka ngemansangka projek tekat ai Baleh.

Nambah ke nya, lebuh bejaku ngenang pekara bukai ba pengerami nya Adenan madah, pengawa iya ti beratka Jaku English ngujungka sekeda orang ngumbai iya anti-nationalistik enggau anti-patriotik.

“Ngeringka Jaku English nadai kaul enggau nasionalisme enggau ant-patriotisme. Nya semina nyadi realistik.

“Apin lama ke udah, aku bisi macha ba surat kabar, lebih ari 1,000 iku lutur di Malaysia ti udah nembuka pelajar sida ninggalka pengawa perubat ketegal enda berapa landik tauka enda manah dalam Jaku English,” ku iya.

Kelimpah ari nya Adenan mega madah, perintah nengeri udah ngaku Unified Examination Certificate (UEC), ti mega sebengkah ari pekara tauka pemutus baru ti udah digaga iya ke nyadi Kepala Menteri.

“Kitai udah ngaku UEC, sida ti bisi UEC ulih minta gawa ba opis perintah nengeri sereta ulih minta bantu belanja pelajar ari Yayasan Sarawak,” ku iya ti mega Chairman Yayasan Sarawak.

Pekara pelajar, UEC, ‘Maratorium on Baram Dam’ enggau ke bukai entara pekara tauka pemutus baru digaga iya sepemanjai nyadi Kepala Menteri kelimpah ari royalti minyak, leka jaku ‘Lain-Lain’ diganti ngena leka jaku Dayak, 90 peratus peranak Sarawak ngajar ba Sarawak lebuh manggai taun 2018 enggau ke bukai.-UB