Pengundi Batang Ai Patut Terus Nyukung BN

LUBOK ANTU: Presiden Parti Rakyat Sarawak (PRS) Tan Sri Datuk Amar Dr James Jemut Masing ngelalau raban pengundi di Batang Ai ngambika terus meri sukung ngagai chalun Barisan Nasional (BN) ba Pengawa Bepilih Kunsil Nengeri (PRN) ke deka datai.

Nyema raban pengundi di sitak Kunsil Nengeri (DUN) Batang Ai milih parti penyakal, iya tentu ngerugi rayat laban perintah BN endang tetap agi bulih mandat merintah Sarawak.

Kenu ku iya, nya alai dikena nentuka DUN Batang Ai terus diarika pengari rayat BN nyadi beri mih sukung ngagai Malcom Mussen Lamoh ke dijangka ngetanka baru penuduk Batang Ai.

“Aku pechaya perintah BN deka terus merintah Sarawak baru lalu beri mih sukung ngagai Mussen maya PRN ila dikena nentuka sitak Batang Ai terus ngasaika pemansang,” ku iya.

Iya madah munyi nya rambau Pengerami Ketuai Begulai enggau Rayat di Rumah Jubang, Sebangki Panjai, LubokAntu, ditu, ensana.

Bela bisi datai Sapit Speaker Kunsil Parlimen Senator Datuk Doris Sophia Brodie,  Menteri Muda Betanam Betupi Moden (Pansik & Makit) Sarawak, Datuk Mong Dagang, Kaban Parlimen Lubok Antu William Nyalau Badak, DUN Batang Ai Malcom Mussen Lamoh, Pemesai Kaunsil Lubok Antu Jack Aman Luat enggau bala tuai raban bansa ke besemak.

Berebak enggau nya, JKKK enggau Biro Indu Sebangki Panjai mujur bulih agih belanja Projek Mit Pemansang Menua Pesisir (MRP) penyampau RM45,000 asil ari pemeri raban menteri enggau pengari rayat ke bisi datai.

Kelimpah ari nya, Dr Masing ke mega ADUN Baleh ngelalau rayat di Lubok Antu anang mendingka jaku ajum parti penyakl ke mantah Tanah Adat Bansa Asal (NCR) sida ari ke disukat kelingi sereta deka diberi surat pala tanah.

Iya madah, raban orang tauka penyakal ke mantah tanah NCR ke tebal agi dipenggi Dayak ari ke disukat sereta diberi surat pala tanah laban sida bisi agenda diri empu.

“Anang mendingka jaku orang ke baka nya nyema sida nagang kita nyukat tanah laban nya tau ngerugi kita empu,” ku iya.-UB