Kenegapka penyerakup ba komponen parti BN

KAPIT: Presiden Parti Rakyat Sarawak (PRS), Tan Sri Datuk Amar Dr James Jemut Masing madahka diri enda nemu sapa bagi chalun Barisan Nasional (BN) ke bediri rambau pengawa bepilih tu ila lalu iya mega nadai kuasa mantaika sapa chalun nya.

Ku iya, semua nya bepanggai ba jari Kepala Menteri nyengkaum Bukit Goram laban iya sigi amat enda nemu sapa bagi chalun nya, tambah mega Bukit Goram tu ukai dipenggi parti iya.

Pekara ke beguna amat ku iya, semua parti komponen BN baka Parti Pesaka Bumiputera Bersatu (PBB), PRS, Parti Demokratik Progresif Sarawak (SPDP) enggau Parti Sa’ati Rakyat Sarawak (SUPP) meseti begempung enggau pangan diri.

Pia mega ku iya, nadai jalai penyakal ulih nyelepakka diri ba kandang menua pesisir enti sema parti komponen BN begempung.

“Rayat meseti nemu pengilap sida ke dulu suba, dalam timpuh lima taun Pelagus nadai nerima sebarang pemansang laban ke dipegai penyakal. Umbas endur kitai ngemansangka Kapit, Bukit Goram sereta Pelagus begulai enggau BN,” ku Masing rambau ngelancharka Bilik Operasyen PBB Bukit Goram di Kapit kena lemai Hari Satu tu tadi.

Masing berasai gaga amat ati lebuh meda semua rayat begempuru baka raban ketuai opis, raban ketuai komuniti sereta kaban BN nyengkaum Pemancha Yong, Pengulu Wong Kie Ing, Kapitan Neo Kee Hoi, raban kunsilor enggau tuai rumah.

“Penatai aku deka ngelancharka Bilik Operasyen PBB Bukit Goram ke alai malam tu mega kitai bedara lalu Lemambang Bangkong Saligie nganggauka petara aki, petara ini kitai ngambika nyukung sereta ngiring sapa bagi chalun ti deka bediri rambau pengawa bepilih tu ila,” ku iya.

“Manah agi aku madah enggau terang, PRS minta dua penuduk baru iya nya Bukit Goram enggau Murum sereta Samalaju nyadi pilih ketiga, lebuh berandau enggau Kepala Menteri, Tan Sri Adenan Satem. Aku enda nemu Bukit Goram tu dipenggi parti ni, tang enti sema iya dipenggi PBB, iya agi parti BN.

“Kami (PRS) deka nyukung PBB di Bukit Goram sereta sida mega nyukung kami di Murum,” pia ku iya.

Ku Masing, sekali tu ukai semina pengawa bepilih di Murum tauka Bukit Goram aja tang mega pengawa bepilih nengeri ti mungkur 82 iti penuduk di serata nengeri tu. Nya alai, iya minta rayat muai ulah ke enda manah (ngayahka pangan diri) sereta patut nyukung diri sama diri. Iya mega minta parti komponen BN ke bukai enda ngachau Baleh.

Iya muji pengawa dipejalaika SPDP ti udah numbuhka raban komiti besai di Bukit Goram dari baruh iring Datuk Paul Igai.

“Diatu dunya ke baru, Kepala Menteri enggai meda kaban ari komponen parti BN ngachau pangan diri lalu deka meda kitai begempung enggau pangan diri. Di mengeri baka di Kuching, Sibu enggau Miri kitai bela enda nemu, tang di kandang menua pesisir tu kitai bela nyaga kandang menua diri empu,” ku iya.

Sekali agi ku iya, iya enda nemu sapa ti deka bediri di menua nya rambau pengawa bepilih ila, tang sida endang nyukung chalun ke bediri ngena lambang BN. Pemansang menua Kapit enda ulih semina dilempai ba Datuk Alexander (MP Kapit) enggau iya empu, BN begunaka raban ke kering dikena ngubah Kapit.

Bela bisi datai ngulu pengawa bedara iya nya OCPD Freddy Bian, ASP Chua Su Hua, enggau Pemesai Pengatur Pengawa, Karon Mapus.

Berebak enggau pengawa lemai nya, Sekretari Politik Kepala Menteri Sarawak, Jefferson Jamit ke nyadi Chairman Besai PBB Bukit Goram nerima piring berekat, ke alai iya dipiringka Lembanbang Bangkong Saligie seraya diperatika bala bukai.

Jamit lebuh ke bejaku madah, BN meseti menang dalam semua penuduk di Kapit, Baleh, Pelagus enggau Bukit Goram dikena ngelaika sukung sida ngagai Kepala Menteri, Adenan.

“Di Pelagus, kitai bela udah nemu PBB ngempu penuduk nya. Nya alai aku minta raban PRS di Bukit Goram nyukung chalun BN di Pelagus dikena nentuka Pelagus enggau Bukit Goram tu dipenggi BN. Aku mega ngarapka nadai sebarang orang bediri di sitak Baleh ngambika ketuai kitai, Masing ulih menang darat,” ku iya.

Penegap BN datai ari sukung renggat nembiak redak enti semua parti komponen BN begempung sereta begulai ngereja pengawa, nya deka ngemujurka pengawa kitai ngemansangka, ku Jamit.-Borneo Post