PBB Bela Asa Tang Nerima Pemutus Menteri Besai

KUCHING: Nengeri tu kelebih agi Parti Pesaka Bumiputera Bersatu (PBB) lenyau seiti portfolio pengudah perintah besai enda nyiri kaban parlimen ari Sarawak nyadi menteri penuh dalam ubah tauka tusun baru kabinet nya,apin lama udah.

Pekara nya dipadahka Sekretari Besai Parti Pesaka Bumiputera Bersatu (PBB), Datuk Dr. Stephen Rundi Utom lebuh dipinta ngenang pasal ubah kabinet perintah besai ke dibantaika Menteri Besai Datuk Seri Najib Tun Razak, kena 27 Jun tu tadi.

Sebedau tu ku iya, nengeri kelebih agi raban pampang Pesaka PBB ngarapka penuduk menteri penuh iya nya Menteri Kebun Bedandang Besai enggau Komoditi ke ditinggalka Datuk Amar Douglas Uggah diberi ngagai kaban parlimen nengeri tu kelebih agi ari PBB.

“Kami asa ati kelebih agi pampang Pesaka PBB pasal tusun tauka ubah baru kabinet perintah besai apin lama.

“Kitai udah lenyau portfolio ke udah ditinggalka Datuk Amar Douglas Uggah sereta melabaka nya deka diganti enggau Kaban Parlimen PBB ke bukai,” ku iya meri penerang pandak ngagai Utusan Borneo nengah aplikasyen WhatsApp kemari.

Apin lama (27 Jun), Menteri Besai Datuk Seri Najib Tun Razak ba aum pengarang berita di Putrajaya madahka Datuk Seri Mah Siew Kiong dichiri nyadi Menteri Kebun Bedandang Besai enggau Komoditi nganti Uggah ti ngetuka diri mangku pengawa nya berindik ari ti bediri minta pilih ba pengawa bepilih nengeri apin lama.

Uggah ti menang ba sitak Bukit Saban udah dichiri nyadi Sapit Kepala Menteri sereta mangku tanggungpengawa nyadi Menteri Betanam Betupi Moden enggau Ekonomi Menua Pesisir, kelimpah ari ke agi nyadi Kaban Parlimen Betong.

Diambi ari Bernama, Dr. Rundi madahka perintah nengeri bejuraika kes sida ngambika Kaban Parlimen Kapit ngarika PBB sereta ngisi penuduk puang ke ditinggalka Uggah.

“Tang Sarawak tetap ngaku pengawa nyiri menteri endang prerogatif menteri besai. Iya udah nerangka rasional ubah kabinet nya sereta kami bebasaka pemutus nya sereta bediri nyukung dibelakang iya.

“Endang dikearapka kami, iya ngemasukka kami dalam ubah besai kabinet iya jemah ila sereta meri terima kasih laban nyiri Datuk Henry sum Agong nyadi Sapit Menteri Dagang Dalam Nengeri, Koperasi enggau Pekara Bebeli Barang,” ku iya apin lama, diambi ari Bernama.

Henry, Kaban parlimen Lawas ngerikod sejarah ke raban bansa Lun Bawang lebuh iya nyadi ketuai keterubah dichiri nyadi sapit menteri dalam kabinet perintah besai.-UB