Pengawa Ngelaban Perintah Semina Masau Hari

BINTULU: Sapit Kepala Menteri ke mega nyadi Presiden Parti Rakyat Sarawak (PRS) Tan Sri Datuk Amar Dr James Jemut Masing madah ngagai komuniti Dayak nadai guna ngelaban perintah laban pengawa nya semina deka masau hari aja.

Kebuah pia ku iya, semina nengah perintah Barisan Nasional (BN) aja ulih ngatur ubah ke lebih manah dikena nentuka nadai bechiping ba mayuh pekara ngambi meri pemaik ngagai rayat Sara-wak.

“Maya aku agi dalam Parti Bansa Dayak Sarawak (PBDS), aku bebendar gawa begulai enggau bala ketuai bukai ke diatu ketebal agi nyadi kaban PRS. Kami udah bebendar gawa laban kami nemu diri betul pengawa tang kami enda ulih ngereja iya.

“Tang diatu kami sebagi ari BN, nya alai kami deka nyukung BN sereta begulai gawa dalam sistem ke pemaik komuniti Dayak.

“Kami nadai kala kerah-kerah madahka diri, nadai kala ngaku sereta mandangka diri ba mua bala mayuh tang kami ulih ngubah sistem ari dalam,” ku Masing madah ngagai rayat rambau pengerami Ngiling Bidai ba Rumah Akai, Menusa, Ulu Suai, urung 90km pen-yauh ari ditu, ensanus.

Ku iya, bisi sekeda undang-undang udah diubah ti ngambika tanah Adat Bansa Asal (NCR) lebih agi produktif.

“Lalu tu pengawa ke dikereja kami dalam perintah. Nya kebuah kami patut gawa dalam sistem nentuka pemaik. Bekereja enggau sida laban kami enda ulih ngereja pengawa ngelui ari sistem. Sebedau tu kami udah ngereja pengawa baka nya tang enda mujur,” ku Masing.

Masing ngenang iya enggau ketuai Dayak bukai kala nyadi penyakal pengelama tujuh taun (1987 – 1994) tang pengudah nya sida jampat sedar sida enda ulih mai ubah ti tau ngangkatka komuniti Dayak sebela enggau komuniti bukai ke jauh mansang di nengeri tu.

Nya alai, sida mutuska diri nyereta BN baru.

Menteri Pemansang Infrastruktur enggau Pengangkut mega ngelalau komuniti Dayak belajar ari bansa China ngambi ngemeratka pekara ba pelajar ngagai bala anak sida.

“Teladan ari ulah komuniti China ti ngemeratka pekara pelajar ngagai bala anak sida,” ku iya.

Nyempelah pasal tanah NCR, iya ngansak sida ngereja tanah enggau produktif agi ngambika sida bisi duit ke chukup dikena nganjung bala anak nampung pelajar ngagai tikas ke menyana agi.

“Semina nengah pelajar aja kitai bisi runding menyana agi dalam semua bidang sekalika ba bidang gawa perintah tauka bidang peribit,” ku iya.

Masing mega madahka kepala menteri udah numbuhka komiti khas, ti betuaika Sapit Kepala Menteri Datuk Amar Douglas Uggah Embas, ti deka nentuka nadai pekara bechiping nyadi ba servis perintah di nengeri tu.

Kelimpah nya, Masing madah ngagai peranak rumah panjai nya kebuah iya ngusung sida laban iya deka ngamatka semaya diri deka ngusung sida nyema iya dipadu nyadi sapit kepala menteri.

Rambau pengerami nya, Masing mega ngemendarka agih belanja sepenyampau RM21,500 ngagai 43 pintu bilik peranak Rumah Akai enggau penyampau RM7,000 ungkup Biro Indu sida.

Baka nya mega, Kaban Kunsil Nengeri (ADUN) Samalaju, Majang Renggie bisi bejaku rambau pegerami nya sereta ngemendarka belanja penyampau RM10,000 ungkup peranak rumah panjai nya.-UB