Anang mudah mantul dalam nyapai pemujur

SAMARAHAN: Atlit Terejun Menua, Pandelela Rinung meransang raban nembiak anang mudah mantul napi pemar ba pengawa ke deka dikereja.

“Rebah sekali ukai reti kitai enda ulih nangkup pengawa tauka juluk nya, uji berari enggau ati puh, ransing sereta disiplin ke tinggi, semua nya tentu ulih japai,”ku iya ba sebengkah pengerami ke diatur palan bebeli barang The Summer Mall kemari.

Awak sejam berengkah 11 pagi nya dikena mensia mayuh kelebih agi sida ke diau ba kandang menua Kota Samarahan ngelala enggau dampih seraya begambar Pandelela ke baru udah nerima insentif penyampau RM1.3 juta ari Perintah Nengeri sereta kompeni ensanus.

Penanyi Semenanjung Malaysia ke tebilang enggau lagu ‘Hijau’ Zainal Abidin bela merindang mensia mayuh ke datai ba pengawa nya ke diatur ejensi dibaruh kuasa Opis Menteri Kuasa, Teknologi Gadung enggau Ai (KETTHA).

ke baru nerima insentif penyampau RM1.3 juta ari Perintah Nengeri sereta kompeni ensanus, dirami baru ba.

Pandelela ti keterubah pulai ke Kuching ensanus pengudah tembu Lumba Olimpik Rio nerima duit insentif RM500,000 ari Perintah Nengeri Sarawak.

Pemeri nya dipadahka Sapit Kepala Menteri Dato Sri Douglas Uggah ba pengawa ngerami Pandelela ke diatur di Dewan Suarah Kuching.

Kelimpah ari nya, Pandelela mega nerima sebuah kondominium berega RM700,000 di MJC Batu Kawa pemeri ari kompeni Tenaga Stabil Sdn Bhd ke alai begunan kondominium nya mega deka ngangkatka nama Pandelela iya nya ‘Kondominium Pandelela’.

Bela ngaku pemujur atlit Sarawak ba Lumba Olimpik Rio ke udah bulih midul perak iya nya Techinirer Sdn Bhd ti meri RM100,000.

Atlit ari Kpg Jugan, Bau nya mujur ngulihka midul keterubah ungkup Malaysia ba Lumba Olimpik Rio 2016 pengudah mujur bulih perak ba pekit terejun 10 meter platform bepasang enggau Cheong Jun Hoong.-BP