Bup Resipi Pasal Pemakai Iban Ditempa SIDS Dilanchar Kemari

KUCHING: Bup resipi ‘Sarawak Kitchen Indigenous Flavours’ ke digaga Sarakup Indu Dayak Sarawak (SIDS) dilanchar kemari.

Bup ke ngundan sentang chara nyumai nitihka asai bansa Iban di nengeri tu nya dilancharka Sapit Kepala Menteri Dato Sri Douglas Uggah.

“Aku berasai temegah pengudah dipadah Chairman SIDS, Tan Sri Dato Sri Empiang Jabu diak bup resipi tu udah diuji chef tebilang entarabangsa, Anthony Bourdain.

“Bup tu ukai semina dikena kitai ngintu enggau ngelaku pemakai bansa Dayak tang mega ulih nyendiaka peluang dagang ngagai peranak nengeri tu ba pengawa mekal perengka ke diguna endur kitai nyendia pemakai nitihka ditulis ba dalam bup,”ku Uggah.

Uggah ke mega Menteri Betanam Betupi Moden enggau Ekonomi Menua Pesisir madah mayuh perengka ngulai ke diguna dalam bup nya mar diulih baka ke ‘kulat mata jani’ daun tepus sereta ke bukai.

“Aku merambu SIDS mekal semua perengka ngulai nitihka resepi bup tu lalu nya nyengkaum pengawa nungkus rempah ngambi tau dijual ba makit.

“Kelimpah ari nya,SIDS mega tau ngelaku bup tu chara online, ngelaku pemakai bansa Dayak ngagai serata dunya,”ku iya.

Ngenang kaul ke sama, Empiang madah bup nya begunaka timpuh 10 taun ditembu lalu pengawa kemari ngepunka singkang SIDS ba atur ngintu pemanah pemakai asal bansa Dayak.

Ku iya, ketegal tebal agi kaban dalam SIDS nya indai orang sereta orang indu ke bekereja,sida semina ngenataika sukung chara volunteer lalu entara kebuah bup begunaka timpuh panjai.

“Pemar ari sukut jaku entara sekeda kebuah bup tu lama ditembu,”ku iya.

Bup Resepi ‘Sarawak Kitchen Indigenous Flavours’ dijual nengah rega RM90 seiti.

Bela datai ex-sapit kepala menteri Datuk Patinggi Tan Sri Dr Alfred Jabu.-UB