Penyiru enggau penyayau Adenan ke S’wak ngelui ari endur bukai di dunya

KUCHING: Sarawak for Sarawakian (S4S) ngasaika ex-Kepala Menteri, Niang Datuk Patinggi Tan Sri Adenan Satem, seiku orang ke chukup temegah nyadi anak Sarawak, nya alai iya enda malu ngaku diri orang Sarawak sereta berani bejakuka hak Sarawak laban penyiru ke Sarawak.

Penyanding Penemu S4S, Peter John Jaban madah, ke bendar Adenan Satem ba mata orang Sarawak, seiku orang ke chukup siru, sayau sereta rindu ke menua tu ngelui ari menua bukai di dunya tu.

“Iya ukai lelaki ke ninggalka menua tu lalu pindah ke bukai, ngumpul reta tengkira tauka ngarapka peluang ke manah agi ba nengeri-nengeri besai.

“Lelaki tu (niang Adenan) orang ke beamai-amai ngemansangka Sarawak. Iya rindu makai pemakai asal menua tu baka ‘Laksa Sarawak’, ngirup ba kedai kupi ke sebaka enggau rayat mayuh kelimpah ngaga awak belepa nginti di Santubong, rindu belagu maya bisi pengerami ba pesisir sereta ngena jaku Melayu Sarawak.

“Mayuh orang enda sebaka penemu. Sekeda nya munyika sinu enti kitai madahka diri ari Sarawak.

“Ba kitai ke endang asal ari Sarawak, kitai udah teleba ninga jaku ke mayuh macham. Kebendar menua kitai endang bisi penyelai ba mayuh sukut,” ku Peter madah nengah penerang ke dianjung ngagai pemberita pengudah ninga berita pemidang Adenan minggu ke udah.

Tu mih perais ke diberi Niang Adenan Satem ngagai kita, ku iya.

“Seumur idup, dalam berapa abad ke udah, kitai bisi seiku ketuai ke pemadu temegah nyadi anak Sarawak.

“Iya nurutka peminta kitai, rayat Sarawak berasai temegah ati lebuh iya nguji minta kuasa otonomi menua tu dipulaika baru.

“Semua orang nemu pasal pekara tu lalu kitai rayat Sarawak meri terima kasih besai ngagai niang,” ku iya.

Maya Niang Adenan Satem ngepunka pangku pengawa diri, ku Peter dia iya semina minta lima taun aja ari kitai, meri iya peluang ngiring Nengeri Sarawak, Berindik ari nya, kitai nemu tu mih ketuai ke bisi vision deka meda Sarawak maju, nitihka peneka rayat mayuh.

“Kitai mega pechayaka iya gawa ukai ketegal parti, tauka ansak raban penyakal, tang ari ati iya empu.

“Kitai ngulitka pengawa iya ti bedau tembu, baka kitai ti ngulitka iya empu. Sarawak udah berupai nyingkang mansang asil pengawa dirandang niang Adenan.

“Kami S4S pechaya, iya mujur ngiring ngembing kitai ngagai tikas ke lebih manah. Nya alai, aku ngarika raban S4S meri terima kasih ngagai niang ketegal penyulut pengawa megai Sarawak,” ku Peter.-BP