JIM mujur ngemuntan chara baru PATI tama ke nengeri tu, ku Mustafar

KUCHING: Opis Imigresyen Malaysia (JIM) mujur ngemuntanka chara baru orang ke tama nadai pemendar (PATI) ngagai menua tu. Modus operandi sida iya nya ngena dua pas dalam timpuh ke sama nengah pintu penama ba padang bilun nengeri tu.

Ketua Direktor JIM, Dato Sri Mustafar Ali madahka piak JIM beratka modus operandi nya laban nangika bala PATI ngeruga pengelikun di menua tu.

Ku iya ke sempat enggau bejalaika operasyen ditu malam ensanus madahka, bisi sekeda orang ti masuk ke nengeri tu mega bisi ngelanggar undang-undang ke ditetapka maya tama ke Sarawak enggau Sabah.

“Di Sarawak kita bisi 40 kes (individu) ke bejalaika modus operandi ti mujur ditemu kitai, kes tu benung dipansik lalu sida 40 iku nya ti ditangkap sereta ditan ba palan ngetan Imigresyen seraya nganti pansik tembu dipejalaika.

“Sida nya nguji ngena chara tauka atur pejalai ti ngelanggar undang-undang, ambika banding sida bisi dua pas masuk ke alai seiti pas pejalai antarabansa lalu seiti pejalai domestik.

“Lebuh sida madahka pejalai domestik udah tentu sida enda diperesa tang sida datai ngena chara entarabansa, taja pia lebuh sida datai sida nyuaka pas masuk domestik. Kebuah sida baka nya laban deka nyeliahka diri ari diperesa,” ku iya ti enggai meri penerang silik bekaul enggau 40 kes berindik ari ke benung dipansik.

Mustafar mansutka pekara nya dalam aum pengarang berita, pengudah tembu baum ‘Penyelarasan Pelaksanaan Frequent Trabellers Facilities’ (FTF) Bil. 1/2017 ke diatur ba bilik baum JIM Sarawak di Begunan Sultan Iskandar ditu, kemari.

“Taja pia kitai (JIM) bulih penerang ari mayuh piak, kitai irauka sida tama lalu diau di menua kitai enggau tuju ke enda manah.

“Ambika banding sida 40 iku tu, enti aku ngagau sida tu temuai, pas sida pas ‘lawatan sosial’ pengelama 30 hari tang lebuh sida ngena chara bukai dia timpuh sida di menua kitai panjai agi.

“Diau ditu lebih timpuh nya siti ari penyalah, ngelanggar atur pas nya seiti ari penyalah, JIM terit dalam pekara tu,” ku iya seraya nesau mensia mayuh meri penerang ngagai JIM nyema tetemuka orang ke ngelanggar atur JIM.

Kelimpah ari nya Mustafar lebuh ke ngenang ‘e-card’ ke dikemeranka di Semenajung Malaysia sereta ulih dikerembaika di Sarawak dikena betapi enggau penanggul PATI di nengeri tu, iya madahka nya dikena ngelala bagi sida ke udah abis timpuh datai ke nengeri tu sereta ngena pas enggau chara ti salah enggau penyalah ke bukai.

Iya ngarapka pengaji di menua tu nyengkaum di Sarawak ngena peluang ke diberi ngerejista pengereja pengawa sida ngagai JIM, dikena mutarka penanggul PATI di menua tu.

“Kitai (JIM) meri peluang berengkah 15 Februrai tu tadi ngagai 30 Jun 2017, lalu pengudah bulih ‘e-card’ nya , pengawa pengerejista digaga nyentuk 15 Februari 2018 endur ngerejista pengawa nyambung kunterik enggau kebukai.

“Tu peluang ke patut direbut pengaji mai pengereja pengawa sida berejista. Laban sida ke enda berejista pengudah 30 Jun 2017 tu ila, udah ngelui 15 Februari 2018 nyin ila JIM deka bejalaika pengawa meresa ngenyit ngagai pengaji ke enda nitihka atur tu,” ku iya.-UB