Semina SPP bisi kuasa milih chalun pengajar: Fatimah

KUCHING: Komiti Servis Pelajar (SPP) megai tanggungpengawa nyiri pengajar lalu ngembuan kuasa milih chalun pengajar, Ku Menteri Pengintu Pendiau, Orang Indu enggau Pengelantang Komuniti Datuk Fatimah Abdullah.

Maya dirandau rambau Pongal Harvest Festival ditu kemari, Fatimah madah opis menteri iya nadai kuasa masuk champur ba pekara nya.

Ku iya, SPP ngembuan proses sida empu ba atur nyiri raban pengajar ke nyengkaum peresa psikometrik.

“Ari nya, sida deka nguji tetiap chalun lalu enti sida tepantup ati enggau pengelandik sereta penemu chalun, SPP deka nyuaka surat chiri,”ku iya.

Iya nambah, Jobs Malaysia seiti palan ke engkeman endur ngenataika pinta nyadi ‘Pegawai Perkhidmatan Pendidikan’ (pengajar).

Iya mansutka jaku nya nimbal tuduh Chairman DAP Sarawak Chong Chieng Jen bedau lama tu tadi ba isu Wong Wang Yuen ke bisi ngenataika pinta nyadi pengajar.

Chong madah pinta Wong ditulak Opis Agama Islam Sarawak(JAIS) lalu deka nemu kebuah JAIS bisi kaul ba atur netapka pemutus.

Nitihka saut Fatimah, JAIS bisi dua iti pengawa puang ungkup pengajar lalu pinta Wong bisi dipeda JAIS.

“Aku minta isu tu dipeda enggau chara ke manah lalu anang sengapa dikemesai,”ku iya seraya madah isu Wong udah dikena DAP beambi ulih.-UB