Manyin: Begempung mih nengah konsep 1Bidayuh

Enda milih asal sitak ni, Bidayuh patut ngenegapka kaul ngambi ulih besemekih enggau bansa bukai 

KUCHING: Ukai munyi dikelandik, bisi Selakau, Singai, Jagoi, Bratak, Biatah, BiBukar tauka BiSadung tang semina sebengkah identiti aja, iya nya Bidayuh, ku Menteri Pemansang Perengka Guna enggau Penyambung Dato Sri Michael Manyin Jawong.

Berindik ari nya, Manyin ngansak bansa Bidayuh lebih Serakup Bansa Dayak Bidayuh (DBNA) ti ngintu pemaik bansa nya kenyau 50 taun ke udah nusun program ke patut ngambika tau nentu Bidayuh tegap besemekih enggau bansa bukai ba atur ngiring pemansang di nengeri tu.

“Kitai udah suah bejuraika pekara tu ba mayuh bengkah forum ke diatur DBNA ngelamatu. Tiga bengkah pekara dikemerat ungkup pemaik Bidayuh.

“Keterubah, kitai ngelalau semua Bidayuh baik  nya di Kuching, Penrissen, Lundu, Bau, Serian enggau Padawan beserakup nengah konsep 1Bidayuh.

“DBNA deka nentuka nembiak bansa Bidayuh enda tinggal ba pekara pelajar ngambika Bidayuh majak mansang lalu iya ketiga kitai angkun nentuka jaku asal enggau adat sereta main asal Bidayuh majak dikerembai,” ku iya.

Manyin mansutka jaku tu ba pengerami pekit ‘Dayung Sangon 2014’ ke diatur di Dewan DBNA, Jalai Ong Tiang Swee ditu, malam ensanus.

Iya nambah, pekara nya dikemerat ketegal semua nya ngelaika identiti bansa Bidayuh ti chukup unik di Nengeri Sarawak.

Tandu iya, sebengkah bup sereba reti ti ngalihka jaku asal ari tiap kandang endur Bidayuh ngagai Bahasa Malaysia enggau English udah digaga lalu kelas ngajar Bahasa Bidayuh mega deka diatur DBNA.

“Kelimpah ari nya, kitai deka muka kelas main asal kena ngajar nembiak baru ba senentang tanda tauka ajat Bidayuh.

“Semua tu deka nentuka nembiak rebak baru Bidayuh ngelala ni bagi pekayan enggau ajat bansa diri,’ tambah iya.

Ba pengerami nya, Manyin nguluka urung 1,000 iku pemesai enggau semua temuai ti nedat dewan DBNA ngeradak Ai Pengayu 2014.

Bela datai Presiden DBNA Datu Ik Pahon Joyik, Menteri Muda Tanggung Pengawa Raban Bansa Datuk Peter Nansian enggau Menteri Muda Pengerai Mensia Mayuh Datuk Jerip Susil.

Pengerami mega bela dikemata Temenggung Datuk James Jimbun Pungga, Temenggung Austin Dimin enggau Temenggung Robert Sulis.-BorneoPost