MPOB nadai ngeluarka tangkan munyi nya: Uggah

Penemu nya sengapa disebut, ejensi tu nadai kala ngeluarka penerang, nagang kilang meli sawit sida

KUCHING: Malaysian Palm Oil Board (MPOB) nyangkal penemu ti nyebut ejensi nya bisi ngeluarka tangkan ngagai kilang sawit ngambika enda meli buah sawit ari sekeda genturung pendiau nyengkaum Kampung Lebur di Serian.

Mansutka jaku nya, Menteri Kebun Dandang Besai enggau Komoditi Dato Sri Douglas Uggah Embas madah, tuduh nya sengapa disebut lalu MPOB nadai kala ngeluarka penerang munyi nya.

“Kitai nyangkal petenah ti madah, MPOB ngeluarka perintah ti ngasuh gudang sawit enda meli buah sawit ari sekeda genturung pendiau nyengkaum Kampung Lebur di Serian.

“Kitai mega ngenggaika tuduh ti madah MPOB sengapa ngayahka orang bekebun mit sawit di nengeri tu. Polisi perintah Barisan Nasional (BN) sigi deka meri servis mantu orang bekebun mit sawit.

“Taun tu kitai udah ngungkupka sabsidi RM150 juta ngagai pekebun mit sawit lalu ba taun ke deka datai mayuh agi sabsidi deka diungkup ngagai sida.

“Kelimpah ari nya, kitai mega nyendia sebengkah raban ti deka meri saup sereta ngajar chara ngintu kebun ngambika pekebun mit ulih ngasilka buah ke manah,’ku iya.

Uggah mansutka jaku tu ba sebengkah aum pengarang berita pengudah ngulu aum Komiti Pematau Kes Enchuri Sawit ditu, kemari.

Aum nya bejuraika kes enchuri sawit ke nyadi di serata menua lebih agi di Sarawak lalu berundingka chara ti ulih dikena ngurangka kes.

Ku Uggah, kenyau taun 2013 nyentuk bulan Julai 2014 penyampau 304 kes enchuri buah sawit bisi diripot di serata menua.

Ketegal nya, iya ngansak semua gudang sawit nyengkaum 69 buah di Sarawak enda meli buah sawit ari penyual ke nadai lisin.

Ku iya, buah sawit ke dibai penyual ke enda belisin nya engka sawit ke dichuri ke enda ditemu ari ni penatai.

“Aku enggau terit ngansak kita anang meli ari penyual ke enda belisin. Pekara tu ngelanggar lisin ke dikeluar MPOB ke alai lisin kilang tau dikinsil.

“Gudang mega dipinta matau penyampau buah ke dibai penyual lalu patut enda ngelui ari penyampau ke ditetap ba lisin sida. Lisin nyual tu tau mega dikinsil enti ditemu nyual buah sawit ngelui ari ke patut,” ku iya.

Bela datai ngulu aum nya Sapit Kepala Polis Sarawak Datuk Dr Chai Khin Chung enggau Direktor Bagi Pengelikun Nengeri Sarawak Datu Dr Yusuff Nook-BP