KUCHING: Sekretari Barisan Nasional (BN) Sarawak Datuk Dr Stephen Rundi madah, dua bengkah parti baru ayan iya nya Parti Tenaga Rakyat Bersatu (TERAS) enggau Parti Rakyat Bersatu (UPP) bedau nyadi parti serakup BN.
Taja pia, iya madah Kepala Menteri Datuk Amar Tan Sri Adenan Satem mutuska penemu mengkang ngenanka pangku pengawa dalam kabinet Sarawak ungkup semua menteri enggau menteri muda ke bisi diatu ari dua bengkah parti nya nyentuk pengawa bepilih besai nengeri ke deka datai ke dipelaba diatur bulan Jun, 2016.
“Kebuah pia laban timpuh sebedau pengawa bepilih besai dipeda alang-alang lalu sida diatu ukai menteri BN tang agi nyadi kaban kabinet nengeri,” ku Rundi madah ngagai pemberita pengudah Aum Komiti Besai Parti Pesaka Bumiputera Bersatu (PBB) ditu Hari Minggu tu tadi.
“Sida (TERAS enggau UPP) bedau masuk BN, nyadi sebarang aja penerang bekaul enggau parti endang datai ari sida empu,” ku iya.
Kaban kabinet tu iya nya Menteri Pemansang Rama Tan Sri William Mawan Ikom, Menteri Muda Servis Komuniti Datuk Peter Nansian, Menteri Muda Rengka Rama Datuk Sylvester Entrie enggau Menteri Muda Pelajar Tumu Anak Mit enggau Pemansang Ruang Bilik Rosey Yunus, udah ngebuka diri ari Parti Demokratik Progresif Sarawak (SPDP) lalu numbuhka TERAS.
Sida ke bukai iya nya Menteri Kaunsil Kandang Menua enggau Pemansang Raban Bansa ti mega nyadi Menteri Wang Kedua Datuk Seri Wong Soon Koh enggau Menteri Muda Pengerai Rama Datuk Dr Jerip Susil mega ngebuka diri ari Parti Se’ati Rayat Sarawak (SUPP) lalu numbuhka Parti Rakyat Bersatu (UPP).-Bernama
TERAS enggau UPP bedau masuk serakup BN
![TERAS enggau UPP bedau masuk serakup BN]()
Reviewed by Unknown
on
August 26, 2014
Rating:
No comments: