Pengawa nutup FB ukai pemutus ke pintar

KUCHING: Pengawa ke deka nutup laman sosial ke dikumbai ‘Facebook’ (FB) ukai pemutus ke pintar laban pangka ari nutup FB nya deka meri bekau ngagai pupu raban bansa, raban profesional tauka raban orang ke bedagang.

Tang kebendar iya, pematut ke deka nutup FB nya kira jalai ke pemadu dudi lalu mayuh chara bukai patut diperundingka dulu sebedau pemutus digaga ngambika enda mayuh orang kena pangka.

Menteri Kereja Raya Datuk Fadillah Yusof madah, nenama aja pemutus ke deka digaga baikka nya bekaul enggau FB tauka media sosial bukai, patut bepelasarka pemutus ti manah lalu anang semina nitihka pengasai ati aja.

“Nama utai ke deka digaga patut diperundingka enggau panjai, pansik bebadas dulu sekalika nya pulai ka pemanah tauka penyai ngagai raban bansa enggau menua kitai.

“Baka nya mega enggau FB sereta media sosial, bisi ke enda iya meri mayuh pemanah tauka mayuh ngenataika pekara ke enda manah, semua pekara nya patut bepelasarka pemanah enggau pengurang,” ku iya madah ngagai Borneo ditu ensana.

Nangkan ke nya, Presiden Serakup Dagang enggau Indsutri Sarawak (SCCI) Datuk Abang Abdul Karim Tun Abang Openg madah, nyema pemutus ke bansa nya amat digaga tentu iya deka meri pangka ngagai raban orang ke bejalaika pengawa dagang.

Nya alai, utai tu media sosila baka FB endang nyadika perengka penyambung ngagai mayuh orang berandau enggau bala kaban sentang pekara dagang sida.

“Nyema pekara tu amat dipejalai nyau baka ke nutup seiti jalai endur ngerembaika pengawa dagang.

“Kami enda ngenggaika nyangka perambu nya bisi mai pangka ke manah ngagai pekara bukai, tang ari sukut dagang iya meri pangka ke enda manah,” ku iya.

Ku iya mega, perintah nyangka ulih mansik chara bukai dikena nagang pengawa orang ke enda beradat maya nguna FB ari ke nutup FB.

“Kami ngarapka perintah berundingka chara bukai laban enda patut nadai chara bukai, pemutus ke nutup FB nya nyangka jalai ke penudi,” ku tandu iya.

Ba penemu raban orang ke profesional, Sapit Mandal Chanselor (Pekara Pelajar enggau Alumni) Universiti Malaysia Sarawak (UNIMAS), Profesor Mohd Fadzil Abdul Rahman ngemansutka penemu sentang pengawa ke deka nutup laman sosial nya ukai chara dikena mutarka penanggul.

Iya madah, tu ukai salah laman sosial tang orang ke nguna nya ke patut betanggungjawap lalu meseti pintar lebuh nguna perengka nya.

“Mayuh pemanah kebendar iya nguna laman sosial tu laban ulih ngerapitka kaul enggau bala kaling, bulih mayuh penerang baka pengawa dagang, pengawa “Tang enti kitai milih enggau chara ke salah tentu iya deka meri pangka ke enda manah,” ku Fadzil.

Iya madah, diatu nama utai ke pemadu beguna iya nya ngajar bala penguna, laban enti nutup FB deka ngujungka mensia mayuh tauka rayat ba menua tu deka tinggal ari arus pemansang media moden.

“Sebedau ngaga sesebengkah pemutusm aku ngelalau awakka pekara nya patut diperunding enggau bebadas,” ku iya.

Kena Hari Lima tu tadi, perintah madahka diri sedia mansik patut ke enda laman sosial FB ditutup ba menua tu nyema iya nerima sukung mensia mayuh.

Menteri Komunikesyen enggau Multimedia, Datuk Seri Ahmad Shabery Cheek madah, pansik nya deka dipelajaika nengah buah penemu ke dipansutka mensia mayuh ba menua tu. -BP