IPT Diatu Majak Ngemeratka Sains Pengerai

KUCHING: Sains Pengerai udah nyadi sebengkah matapelajar ke pemadu dikemerat kemaya haritu lalu berindik ari nya, iya udah ngerembai ba Palan Pelajar Tinggi (IPT) di menua tu.

Sapit Menteri Pengerai Malaysia Dato Seri Helmi Yahaya madah, nengah NKEA, pengawa pelajar nyengkaum pelajar Sains Pengerai disadang ngenataika pemisi RM60.7 billiun manggai ba taun 2020 ila.

Ketegal nya, iya netapka pengawa nyendiaka sepital, kelinik lalu palan pematih deka chakah agi dipejalai ngambika semua pemaik nya bela diasaika peranak menua tu.

“Berindik ari nya, kitai angkun nyendiaka pelin ti deka nentuka raban orang ba pengawa perubat ulih ngangkatka tikas pengelandik diri nengah kos diploma lanjutan.

“Ba bulan September tu tadi, 6 bengkah matapelajar sains pengerai udah diangkatka ngagai tikas diploma lanjutan iya nya kos ‘Perawatan Kesihatan Kardiaovaskular, Onkologi, Perioperatif, Perawatan Rapi, Gerantologi enggau Perawatan Paliatif,’ “ku iya.

Iya mansutka jaku tu ba Majlis Konvokesyen 2014 Palan Pematih Opis Menteri Pengerai Malaysia (ILKKM) Zon Sarawak enggau Sabah di Palan Aum Borneo Kuching (BCCK) ditu, kemari.

Nambahka nya, Hilmi netapka Opis Menteri Pengerai Malaysia (KKM ) deka balat agi ngemeratka servis pengerai di Sarawak enggau Sabah.

“Tu ketegal kededua nengeri tu ngembuan tanah ti chukup besai sereta pendiau rampa menua ti ngembuan mayuh penguji.

“Kitai deka ngaga mayuh agi kelinik di menua pesisir nyengkaum kelinik mindah kin-kitu. Servis lutur terebai deka chakah agi dipejalai ngambika peranak menua pesisir enda tinggal ba program pengerai,” ku iya.

Ngenang konvokesyen kemari, Hilmi ngelalau raban graduet seruran ngemeratka atur kereja ti bekualiti ngambika tikas servis ti diberi ngagai mensia mayuh manggai ba tikas ke pemadu tinggi.

“Maya bejalaika tanggung pengawa, kitai patut ngemerat tikas kualiti kereja ti udah ditetapka KKM lalu dikerembai ba tiap unit dalam opis pengerai.

“Kitai patut meretika pekara ti nentuka kualiti graduet iya nya tikas kualiti kereja ti diberi tiap iku graduet ke nyadi modal mensia menua,’ku iya.

Berindik ari nya, iya ngarap semua ILKKM ulih ngeluarka modal mensia ti ngembuan pengelandik sereta meretika pinta ba servis pengerai.

Ku iya, graduet ari ILKKM endang besai reti ba pekara pengerai sereta diperebutka sepital perintah enggau peribit di serata menua nyengkaum menua di timur Tengah.

Ba konvokesyen nya kemari, penyampau 1,489 iku nerima diploma ba mayuh bengkah pelajar dalam sains pengerai lalu 476 iku nerima setipikit.

Bela bisi ngulu atur pengawa nya, Sapit Ketuai Sekretari (atur Pengawa) KKM Datuk Hasnah Salleh, Direktor Opis Pengerai Sarawak, Datu Dr Zulkifli Jantan enggau orang bukai.-BP