Penguna Highway Pan Borneo Nadai Dipinta Mayar Tol- Najib

BINTULU: Perintah Besai ngenukuka penguna Highway Pan Borneo nadai dipinta mayar tol laban nya meh indu jalai ke ditengah penguna ari kededua nengeri Sarawak enggau Sabah.

Menteri Besai Datuk Seri Najib Tun Razak madah, bida enggau di Semenanjung ke alai highway ke ditengah din dipinta mayar tol, laban bisi jalai bukai ti disediaka, iya nya jalai ke digaga Opis Kereja Raya (JKR)ti ulih ditengah penguna.

“Highway Pan Borneo nya indu jalai sereta nadai jalai bukai, nama kebuah penguna deka dipinta tol. Di Semenanjung, indu jalai iya nya highway utara selatan ke sama bisi ngembuan jalai bukai,” ku iya lebuh bejadi renggat keterubah projek Highway Pan Borneo Sarawak ke beungkus RM13 biliun ditu kemari.

Ku Najib, di Semenanjung, penguna jalai alun tau milih sekalika deka nengah indu jalai ke bisi dipinta mayar tol ngambika ulih datai jampat ba palan ke dituju,tauka milih nengah jalai bukai ke bisi jauh mimit.

Ku iya, renggat ti nangkan tu projek highway tu deka dipejalaika taun tu ti dipelaba deka dipeenyadi bulan September.

Menteri Besai nya mega madah, enti udah tembu ila, nya ukai semina nambah ngemanahka infrastruktur Sarawak, tang muka mayuh agi peluang ekonomi ngagai semua rayat di nengeri tu.

Iya mega ngenggaika penemu ti madahka projek Highway Pan Borneo nya projek besai ke menyati duit rayat, laban projek nya disadang deka mai pemaik dalam timpuh ke panjai ngagai peranak menua tu.

Digaga ngena ungkus RM27 biliun, projek Highway Pan Borneo nyengkaum pengawa ngaga sereta ngemanahka jalan alun sepenyauh 1,663 km ari Sarawak ke Sabah iya nya 936 km jalai di Sarawak sereta 727 km di Sabah.

Ungkup Sarawak, bungkur ngaga nya projek sekali tu iya nya ngaga jalai sepenyauh 919 km ungkup jalai seiti lurung ari Tanjung Datu ke Sematan sereta ngaga jalai dua lurung ari Sematan ke Merapok.

Pengawa ngaga jalai nya belabuh sehari tu di Sarawak, ke alai renggat keterubah sepenyauh 43 km ari Nyabau ke Bakun ti disadang tembu ujung taun 2017 ditangkan enggau jalai Tanjung Datu-Sematan-Miri-Limbang-Lawas ke disadang tembu digaga dalam timpuh lapan taun, iya nya tengah taun 2023.

Kepala Menteri Tan Sri Adenan Satem ke sama bisi bejaku ba pengerami nya madah, pengawa berunding enggau konsesi tol di Kuching, Sibu sereta Miri mengkang dipejalai lalu bedau bisi pemutus sekalika deka ngenurun tauka nginsil tol ketetiga kompeni nya.

“Enti ulih tol nya deka dikinsil, tang bedau diputuska, kami deka ngelempungka tating pengidup penguna jalai alun ke end atau enda mayar chukai jalai sereta bekelimat ungkus pengidup,” ku iya.

Ku iya, pemutus perintah besai ti enda minta bayar tol ba highway Pan Borneo, endang pemutus ke betul laban nya indu jalai ungkup peranak Sarawak ke tuju ekonomi enggau pengawa rama.

Ku iya, pengawa ngaga Highway Pan Borneo nya kelai komitmen perintah besai enda bulaka semaya baka ke dalam manifesto Pengawa Bepilih Besai ke-13 suba.

Bela bis ngulu pengerami nya, Sapit Kepala Menteri Sarawak Tan Sri Alfred Jabu, Ketuai

Sekreteri Menua Malaysia, Tan Sri Ali Hamsa, menteri kabinet perintah besai enggau nengeri, ketuai opis sereta ketuai raban bansa.- Bernama