Sarawak Bisi Peluang Mansang Sereta Maju

KUCHING: Menteri Besai Datuk Seri Najib Razak madah, Sarawak bisi bendar peluang mansang sereta maju dalam Malaysia.

“Aku suah ngelai, Sarawak tu endang deposit tetap Barisan Nasional (BN), aku mega berani madah enti kerusi di menua tu diarika komuniti Sarawak, tentu sitak pengawa bepilih nya diempu BN seraya nyadi deposit tetap BN.

“Aku ke nyadi ketuai ba renggat Perintah Besai, deka terus mantu Sarawak mujur sereta mansang dalam Malaysia.

Aku pechaya Sarawak bisi peluang besai. Aku ulih ngasaika peneka orang Sarawak lalu sebengkah ari projek ke semak ba ati peranak Sarawak iya nya Pan Borneo Highway, ke udah belabuh digaga nyengkaum sempekat pemereti ati deka disain enda lama agi,” ku Najib.

Najib madah munyi tu lebuh bejaku ba atur pengawa Makai Lemai Pengerami Gawai Dayak di Dewan DBNA di Jalai Kumpang ditu ensana, ke alai atur pengawa nya diatur raban bansa Bidayuh.

Bekaul enggau projek Pan Borneo Highway, iya madahka diri udah baum enggau Kepala Sekretari Perintah Menua begulai enggau Opis Menteri Wang, pengawa ngaga Pan Borneo Highway deka dipejalaika enggau jampat.

“Tu semaya aku ngagai orang Sarawak lalu aku deka ngamatka semaya aku nya ngagai orang Sarawak,” ku iya.

Ngenang bida pemansang entara menua pesisir enggau mengeri di Sarawak, nengeri tu deka mansang baka semenanjung.

“Pemansang di Sarawak deka sebaka enggau semenanjung. Nyangka nya dalam timpuh ke panjai, ngena belanja ke besai tang enti kitai nyaga menua kitai enggau manah, kitai ulih ngiga asil lalu penambah asil nya deka dibagi sama rata.

“Dalam Langgur Pemansang Malaysia Lumpar Ke-11 (RMK 11), aku bisi nyebut, pemansang menua pesisir deka dikemeratka perintah BN,” ku iya.

Iya muji peranak menua Sarawak ke bebasaka pangan diri taja pan bisi 27 etnik sereta bisi lebih 40 bansa jaku.

“Aku nyebut pekara tu laban nya pengawa aku beratika (social justice) di Malaysia, laban kitai enda ulih bisi sitak menua bukai ke maju agi ari orang bukai. Sarawak udah ngayanka penaluk ngagai Perintah menua kenyau ari taun 1963.

“Kami ngelala Sarawak tu pangan tauka kaling ke tegap, lalu aku pan nemu peranak Sarawak deka terus nyukung perintah BN,” ku iya.

Nimbal jaku Kepala Menteri Datuk Patinggi Tan Sri Adenan Satem ke madah, perintah nengeri Sarawak deka terus nyukung Najib, timbal Najib:

“Iya (Adenan) udah mandangka sukung iya enda ngira lebuh maya aku tusah tauka senang, lalu ukai semina lebuh maya lantang aja.

Najib entara Menteri Besai Malaysia ke udah suah nemuai ke Sarawak enti dibanding enggau ex-Menteri Besai Malaysia ke dulu.

“Aku udah mayuh mantu Sarawak, lalu aku deka terus nyadi pangan kita sereta nyukung Sarawak, nya alai maya pengawa bepilih besai menua Sarawak (PRN11) ila, sukung Kepala Menteri kita,” ku iya.

Iya mega madah nyadi PM Malaysia, iya bepegai ba prinsip nyadi PM ungkup semua raban bansa, adil, sereta enda bepilih bulu.

Najib muji komuniti Bidayuh ke seruran komited, sukung sida iya ngagai BN sereta muji bansa Bidayuh ke nyadi komuniti ke pengabis mit di Malaysia (8% ari pemayuh mensia di Malaysia) tang sida iya mega orang ke ngembuan pelajar ke tinggi sereta komuniti ke progresif entara semua komuniti.

“Bisi sebuah ruang bilik Bidayuh ke dikelala aku, iya bisi 9 iku anak tang semua anak iya pas universiti.

Tu mandangka kualiti, lalu enti komuniti Bidayuh betatika pelajar, aku pechaya komuniti Bidayuh deka maju lalu sida tu mega entara komuniti ke ngisi peluang pengawa ba opis perintah enggau peribit.

Nimbal jaku Manyin ke minta geran kena ngaga palan pengenduh di DBNA dia, Najib madah, iya deka bejuraika pekara nya dulu enggau Adenan.

Dewan DBNA suba lebuh iya digaga, ngena belanja RM6.8 juta lalu dipenyadika Najib empu.

“Aku deka berandauka pekara nya enggau Kepala Menteri dulu, enti Kepala Menteri meri kita geran, nadai salah aku sama meri kita geran lalu ngamatka utai ke dipinta kita, ngambika komuniti Bidayuh bisi penguntung ari infrastruktur tu,” ku iya.

Sama bisi ngulu atur pengawa nya kemari, bini Najib Datin Seri Rosmah Mansor, Kepala Menteri Datuk Patinggi Tan Sri Adenan Satem enggau bini iya, Datin Patinggi Datuk Jamilah Anu, bini Manyin Datin Sri Mary Manyin, Sapit Kepala Menteri Datuk Patinggi Tan Sri Alfred Jabu, Speaker Kunsil Nengeri Datuk Amar Asfia Awang Nassar enggau sekeda menteri kabinet enggau Perintah besai.-UB