Projek Jalai Raya 15 km ari Entulang-Kejatau sebagi ari perambu pemansang di Sri Aman

SRI AMAN: Jalai Raya urung 15 kilometer (km) pemanjai ari belabuh Entulang, Kampung Muhibbah ngagai Kejatau ti beungkus RM50 juta antara projek ke udah diperambu ungkup pemansang di Sri Aman.

Menteri Muda Pemansang Menua Pesisir enggau Pengawa Berumah, Datuk Francis Harden Hollis madah, kelimpah nya projek nangkir Jalai Sri Aman-Simpang Temudok Sri Aman mega nyadi perambu pemansang ditu.

Iya madah, kededua projek nya deka dikemeratka perintah dulu nyema iya udah bulih pemendar, projek tu disadang deka dipejalaika nengah Langgur Pemansang Malaysia Lumpar Ke-11.

Kaban Kunsil Nengeri (SDUN) Simanggang madah munyi nya rambau Pengawa Nyuaka Setipikit (Nampung Pengawa) ngagai 20 iku Ketuai Raban Bansa DUN Simanggang ke diatur ba sebengkah restauran tebilang ditu, kemari.

Kenu ku iya, bela diperambu deka dikemansangka mega iya nya Jalai Basi-Stuga-Engkilili enggau Jalai Pasir Panas-Batang Lupar Lidong.

“Keretas kereja semua projek nya udah dianjung ngagai perintah nengeri lalu nyema iya udah bulih pemendar nyadi iya deka nambahka pemansang jalai raya di sitak ditu.

“Kitai chukup ngarapka juluk tu tejapai ngambika meri pengelantang ngagai mensia mayuh ke deka ngelawa menua Sri Aman udah tu,” ku iya.

Berebaka enggau nya, iya mega nangkan bala ketuai raban bansa ditu ngambika seruran matau penanggul ke bisi ditapi nembiak redak diri.

“Penanggul ke pemadu berat diatu iya nya bisi sekeda rayat ke apin ngembuan tingki enggau surat pengada.

“Penanggul tu ukai semina nyadi ba seiti dua buah rumah panjai tang mega ditapi nyau deka semua rumah panjai di nengeri tu. Nya alai, tu mih tanggungpengawa bala tuai raban bansa iya nya mantu nembiak redak sida minta dua bengkah dokumen nya dikena ngenukuka sida amat peranak menua tu,” ku iya.

“Sebedau ngenukuka peminta sida, arapka pansik dulu penatai sida lalu kitai enggau meda pekara bukai nyadi laban bisi sekeda kes sida ke ukai peranak menua tu nyau nyadi peranak menua,” ku tandu iya.

Harden mega nesau bala tuai raban bansa ngambika terus ngiring nembiak redak sida nyukung perintah laban semina perintah aja ulih mai ubah enggau pemansang ngagai sida.

Sama bisi datai, Temenggong Sii Toh Peng, Temenggong Samuel Lawen, Pemancha Micheal John Sanggop, Pemancha Lee Siang Hua sereta Pengulu Naggles Lambai.-UB