Sitak Parlimen Sibuti beguna RM30 juta dikena ngemujurka pemansang: Ahmad Lai

MIRI: Tiga projek infrastruktur baka bekal karan, ai enggau jalai alun deka dikemeratka dalam Bajet 2016 ungkup sitak Parlimen Sibuti.

Kaban Parlimen Sibuti Ahmad Lai Bujang madah, nya seripak enggauBajet 2016 ti dipejurai Menteri Datuk Seri Najib Tun Razak kena 23 Oktober tu tadi ungkup penyikap perengka guna di menua pesisir Sarawak.

“Kami deka minta urung RM30 juta dikena ngemujurka mayuh bengkah projek pemansang di menua pesisir ungkup penyikap perengka guna sereta nyungkak ekonomi rayat di menua pesisir,” ku iya ditu kemari.

Sabah enggau Sarawak nerima penyampau ungkup belanja RM29.2 bilion ba Bajet 2016 ngambika bisi dikena bejalaika mayuh bengkah agenda pemansang di kededua buah nengeri nya.

Ngenang nya baru Ahmad Lai madah, ari penyampau nya sida deka minta RM30 juta ari perintah nengeri dikena ngemujurka mayuh bengkah projek pemangsang ti pulaika pengelantang rayat.

“Nya mega nyengkaum sekeda projek betanam betupi (baja enggau benih), jalan alun ke ladang enggau kebun, sereta ke guna orang berikan baka bot, pukat enggau mayuh macham agi,” ku iya.

Ku iya, tebal agi peranak menua pesisir ngemeranka industri betanam betupi enggau berikan lalu Bajet 2016 diasai ke pemadu manah dikena ngemujurka peminta enggau pengelantang rayat.

Ku iya, sekeda tiang telekomunikasyen mega bisi diperambu perambu perintah dikena ngemanahka agi sistem penyembung sereta nyedia servis internet ngagai bala nembiak ti besekula di menua pesisir.

Dulu ari nya, iya nyuaka geran ari perintah besai enggau bantu ari Kepala Menteri ngagai beberapa buah masjid enggau surau di Sibuti nyengkaum di Miri sereta sekeda gerempung.

Masjid At-Taqwa Miri enggau Masjid Al Mutaqqin Bekenu sama nerima ungkup belanja RM350,000 nengah bantu ari Kepala Menteri dikena ngemanahka agi penyikap perengka guna nyengkaum air-cond.

Kelimpah ari nya 10 buah agi Gerempung Ukai Dikuasa Perintah (NGO) sereta Komiti Pemansang enggau Pengelikun Genturung Pendiau (JKKK) nerima belanja ari di Parlimen Sibuti ke alai semua penyampau nelanja ke disadung nya bisi RM340,000.-UB