Polis Kontinjen Sarawak begunaka bantu tambah kena napi PRN11

KUCHING: Kontinjen Sarawak begunaka pemesai, raban polis sereta logistik tambah dikena ngenukuka Pengawa Bepilih Besai Nengeri ti Ke-11 (PRN11) tu ila ulih dipejalai enggau lanchar sereta likun.

Kepala Polis Menua (KPN) Tan Sri Dato Sri Khalid Abu Bakar madah, nya berindik ari penambah 11 sitak Kunsil Nengeri (DUN) baru ba PRN ke sekali tu.

“Kontinjen Sarawak patut bisi ditambah raban ari luar, nya alai kami deka mai pemesai enggau raban ari Sabah enggau mimit ari Semenanjung Malaysia, maya PRN tu ila.

“Nambahka nya (maya aum tadi) kami mega nentuka perengka pengangkut tauka logistik ti deka dibai kitu (Sarawak). Laban kitai nemu pelilih menua di Sarawak tu jauh sereta tusah dilawa.

“Kitai nemu PRN ke sekali tu bisi 11 sitak DUN baru, nya alai udah tentu nya begunaka mayuh agi anggota, logistik enggau ke bukai,” ku iya ti enggai madahka penyampau semua anggota polis ti bejalaika pengawa maya PRN tu ila.

Khalid mansutka pekara nya dalam aum pengarang berita ke diatur ba Bilik Tetamu, Indu Opis Polis Kontinjen Sarawak, pengudah baum enggau raban polis Sarawak ditu, lemai kemari.

Nitih penerang ari iya, di nengeri tu bisi lebih 2,700 palan muai undi lalu tiap palan begunaka seiku polis.

Kelimpah ari nya, iya madahka aum nya mega berandauka pasal belanja dikena maya PRN tu.

“Berebak enggau pengawa bepilih kitai enda ulih ngacau pengawa ba balai, pondok ke udah bisi, nya alai pekara tu patut diperatika.

“Aum lemai tu (kemari) dikena kami nentuka naka ni polis ditu udah nyikap diri napi PRN. Kami patut berengkah nyikap diri ari diatu dikena ngenukuka PRN ila bejalai enggau lanchar sereta likun.

“Nya kebuah aku mai Pengarah Cawagan Khas, Pengarah Keselamatan Dalam Negeri, Pengarah Pengurusan, Pengarah Jabatan Logistik datai kitu lalu meda kediri empu lalu ngaga langgur nama ke patut,” ku iya.-BP