Randau KM Enggau MB Bisi Ngayanka Asil

KUCHING: Aum kededua pemesai antara Kepala Menteri (KM) Datuk Patinggi Tan Sri Adenan Satem enggau Menteri Besai (MB) Datuk Seri Najib Tun Razak bekaul enggau nurunka kuasa autonomi ngagai Sarawak, meri pemutus ke positif antara Sarawak enggau Semenanjung Malaysia, ke mungkur tiga belas pekara ba renggat keterubah ari tiga renggat randau tu.

Adenan maya nurun baum enggau Najib di Putrajaya ensanus ngamatka jaku iya deka bejuraika pekara autonomi Sarawak, lalu ukai semina bejaku sengapa, ku iya.

“Kami udah berandauka pekara tu, antara aku enggau PM bekaul enggau hak Sarawak bepelasarka Konstitusyen Malaysia, baruh ‘in-governmental committee report’, baruh ‘Cobbold Commission Recommendation’ bekaul enggau autonomi Sarawak dalam Malaysia,” ku Adenan.

Iya madah munyi nya ba aum media ti digaga di opis Kepala Menteri di Wisma Bapa Malaysia ditu, kemari.

Antara pemesai bukai ke bisi ngulu aum media nya kemari, Sapit Kepala Menteri Datuk Patinggi Tan Sri Alfred Jabu, Sekretari Perintah Nengeri Tan Sri Datuk Amar Morshidi Ghani, Menteri Muda Perengka Guna Mensia Mayuh ti mega Sekretari Besai Barisan Nasional (BN) Datuk Dr. Stephen Rundi anak Utom, Menteri Pemansang Infrastruktur enggau Penyambung Dato Sri Michael Manyin, Menteri Pemansang Rama Tan Sri William Mawan anak Ikom, Chairman Barisan Nasional Backbenchers ti mega nyadi ADUN Semop Abdullah Saidol sereta sekeda pemesai bukai.

Aum Autonomi tu dibagi ngagai 3 bengkah, ke alai pemungkal ti digaga kemari bekaul enggau pekara administratif, kedua nangkan tu ila bekaul enggau hak sereta konstitusyen Sarawak lalu ketiga bekaul enggau ungkup belanja iya nya ‘financial provisions’ ti deka digaga nangkan hak sereta konstitusyen.

Pekara ti diberi, kuasa kena ngatur Pengawa Opis Perintah Nengeri Sarawak, bisi dalam tiga belas pekara, iya nya:

1). Pegawai Undang-undang Menua diberi kuasa ulih ‘Public Prosecutor’ nengah Kod Prosedure ‘Criminal’ ngaga ‘prosecution’ ke penyalah baruh ordinan nengeri ari pemun seiku orang nya diukum ba kort mit datai ngagai renggat ngapil.

2). Udah disetuju mega nurunka kuasa ngagai pemesai perintah nengeri diasuh ngarika ‘Public Service Commission’ enggau ‘Education Service Commission’, ba pengawa madu pemesai ngagai ‘Federal Civil Service’ nyengkaum pengawa ngajar sereta servis pengerai.

3). Pangku pengawa ba Opis Imigresen Sarawak deka digaga manah agi ngambika ulih ngemanahka kuasa dalam nengeri, enggau penambah urung 100 pangku pengawa, sereta pengulih ngereja pengawa nya ujung bulan Februari tu ila.

4). Penyampau pengajar Sarawak ke ngajar di Sarawak deka ditambahka ngagai 90 peratus (%) ari pemayuh pengajar di Sarawak manggai taun 2018. Kena beratika tagit tu ulih dijapai, pengajar sementara ulih diperundingka lalu ulih ngambi Diploma dalam Pelajar maya sida iya ngajar.

5). Kuasa warden trafik ungkup Opis Kandang Menua Sarawak deka diberi ngagai Opis Kunsil baka Majlis Perbandaran Miri, kelimpah ari DBKU enggau MBKS.

6). Perintah Nengeri Sarawak enda tau enda dipinta permit tauka pemendar sebedau sebarang pengawa berikan di tasik dalam menua tu digaga lalu dituju ngagai sebuah komiti ke endang ungkup ngaga pengawa tu.

7). Perintah Menua Sarawak enda tau enda ditanya dulu sebedau ngaga ‘Federal Legislation’ ke bisi impak ba Perintah Nengeri Sarawak, ti diungkup ulih Undang-undang.

8). Pengawa merambu projek pemansang Perintah Besai di Nengeri Sarawak deka dikemeratka dalam Perambu Pemansang Nengeri Sarawak ke ungkup lima taun bepelasarka bajet ti udah dikemendarka. Pengawa projek nya deka dianjung tauka (negotiated) antara Opis Menteri enggau Perintah Nengeri Sarawak baka berundingka endur sekula nya digaga, sepital sereta ngaga projek pemansang bukai.

9). Opis Menteri mega deka ngambi atur nambah pemayuh nembiak Sarawak ti ngerijista diri ngambi degree dalam pekara berubat dalam universiti perintah, alai nembiak Sarawak patut diberi pemerat masuk program ‘foundation studies’ di UNIMAS.

10). Pekara ti disetuju tu mega sekeda sitak ke ulih dibagi kuasa deka dikelala ngambika kuasa ulih dikena tauka dibagi ngagai Direktor Besai nengah Seksyen 49 dalam pekara ‘Environmental Quality Act 1974’ ngagai Pegawai Nengeri tauka opis perintah menua tu.

11). Pemansang projek rumah di Sarawak deka digaga nengah Aum Komiti Begempung, kena beratika ijinsi nengeri sama dibai dalam pengawa merambu, ngaga sereta beratika sukut projek to digaga nya di menua tu.

12). Pekara tu mega besetuju iya nya pemansang pengawa lumba enggau main di Sarawak digaga begempung enggau Perintah Nengeri Sarawak. Opis Menteri Nembiak, Lumba enggau Main mega dalam proses ngemanahka agi genteran Akta Pemansang Lumba enggau Main 1997, ti dijangka tembu ujung taun 2016.

13). Pekara tu meg besetuju Perintah Nengeri Sarawak deka bejalaika pengawa nengah Opis Pengawa Rama. Semua pangku pengawa deka dipindah ngagai ‘State Civil Service’. Perintah Besai deka nyendiaka 50% kos kena melanja baka ke diputuska ‘National Finance Council’.

Adenan madah ba Poin no: 1. Kuasa nya diberi laban ngelama tu, kuasa nya digaga ‘Federal Attorney General’ , tang diatu kuasa nya diberi nitihka Ordinan Sarawak laban kitai bisi Undang-undang diri empu, sereta pemesai kitai empu, ku iya.

“Dalam Poin no: 2, pemisi opis ‘Public Service Commission’ dalam commission servis pelajar Sarawak, enda tau enda orang Sarawak sereta ngaga interbiu nya, ‘to the entries into the service of federal officers in Sarawak’ lalu ngaga ‘recommendations’ ngagai opis besi di Kuala Lumpur, reti nya kitai bisi kuasa diatu, lalu jangka aku ulih diperundingka Perintah Besai, alai kuasa maduka pemesai Perintah Besai di menua tu kelebih agi orang Sarawak empu,” ku iya, lalu nandu baru Poin no: 2, ungkup Imigresen enda tau enda diisi orang Sarawak empu.

Baka Poin no: 4, Adenan madah enti suba, nadai ungkup ngambi pengajar sementara tang diatu pangku pengawa nya udah dikemendarka, lalu tau enda ibuh ngambi Diploma dalam Pelajar laban belajar Diploma nya ulih digaga lebuh sida iya ngajar dalam timpuh dua taun nya.

“Ngambika Sarawak ulih ngemayuhka pengajar menua tu nganti pengajar ari Semenanjung Malaysia. Laban kena kita nyendiaka pemayuh pengajar ari menua tu nyapai 90%. Naka kediatu, kitai agi kurang pengajar ari menua tu empu,” ku iya.

Kelimpah ari nya, Adenan madah, ba jurai kedua tu ila, antara Adenan enggau Najib deka bejuraika pekara bekaul enggau hak sereta konstitusyen, lalu jurai ketiga bekaul enggau ungkup belanja administratif.

“Renggat ketiga bekaul enggau atur pejalai wang baruh konstitusyen (geran sereta pekara bukai). Barang projek ti digaga di Sarawa enda tau enda nyengkaum Perambu Lima Taun, lalu nangkan nya ‘contractors driven projects’ nadai agi digaga. Lalu semua pemansang ke digaga di Sarawak enda tau enda betanya dulu ngagai Perintah Nengeri Sarawak,” ku iya.

Berindik ari nya, Adenan mega ngelalau penyakal baka Parti Tindakan Demokratik (DAP) anang semina bejaku aja, tauka ngeleseika pemesai Perintah Menua ke endang amat-amat betatika autonomi Sarawak ke rayat Sarawak.

“Anang ngambi kredit (ngambi nama manah aja), pengawa seiti pan enda digaga DAP…Pintu nya nadai agi dibuka ke sida iya (DAP), semina bejaku mayuh aja,” ku Adenan.

Nya alai, Adenan madah minta rayat meri iya peluang lima taun agi ngambi semua pemujur autonomi tu ulih digaga iya ari Perintah Besai.

“Enti deka meda semua utai tu nyadi, beri mandate ke besai ngagai BN, ngagai aku empu, ngambika ulih ngentapka agi penuduk kitai,” ku iya.-BP