Raban Indu Dayak Patut Dinamik Sereta Proaktif

KUCHING: Raban indu Dayak dilalau anang kelalu bepanggai ba laki diri sentang pengawa ngiga belanja ungkup diri empu.

Tukang Wang Grempung Bansa Dayak Sarawak (SDNU) Christopher Gira Sambang, ti mega nyadi ADUN Tamin, madahka manah agi bala indu Dayak belajar ngena pengelandik ngemansangka diri ba pengawa dagang ke ulih nyungkak penatai pemisi sida sebilik.

Gira madahka chukup mayuh kus, bengkel bekait enggau pengawa dagang ke ulih dipasuk raban sida (indu Dayak).

Iya muji Serakup Indu Dayak Sarawak (SIDS) pating Segitin enggau Merdang Gayam ke merambu deka ngaga mayuh agi aktiviti ekonomi kelebih agi bekaul enggau kus kraf jari.

Gira madahka ari perati iya, orang indu lebuh ngereja pengawa lebih siru ari orang lelaki, kelebih agi maya sida ngatur pelajar anak, mutarka belanja dapur, sereta pengerai. Enda baka lelaki, bisi lubah mimit ngintu anak sida diri.

“Aku berasai temegah ati, meda SIDS Pating Segitin enggau Merdang Gayam beratka kaban serakup sida.

“Aku berasai teperansang ninga sida (SIDS Pating Segitin enggau Merdang Gayam) deka ngatur kus kraf jari ungkup kaban serakup. Tu ngingatka aku, indu kemaya hari tu enda kelalu bepanggai ngagai laki sida ti nyadi ketuai bilik ngiga belanja.

“Kekadang kitai beratika maya bisi penusah ke nyadi ngenyit ba ruang bilik, nya alai aku ngelalau raban indai orang seruran nyikap diri ba pekara ke tau pulaika pemaik,” ku iya madah lebuh bejaku bejadika ulang taun ke-15 patingg nya di sebengkah hotel ditu, malam Hari Enam tu tadi.

Iya mega madahka trend dunya diatu ba atur ketuai mega udah berubah, lalu nya kebuah lelaki kemaya hari tu, jarang nengali kediri nyadi ketuai.

Iya bechuntoka England enggau Germany, nyadi dua buah menua ke bekuasa ke milih orang indu nyadi menteri besai. Ba seiti timpuh suba, urung 22 buah menua dipegai ketuai indu.

“Nyangka enda lama agi, sebuah agi menua, iya nya USA, deka dipegai seiku indu ari parti Demokrat, Hillary Clinton enti iya mujur ngalahka chalun Republican, Donald Trump,” ku iya seraya meransang raban indu Dayak nyadi orang ke dinamik sereta proaktif.

Gira mega muji pemenang Olimpik Pandelela Rinung, iya nya seiku anak Dayak ari Sarawak, ke udah mujur bulih midul perak ba Lumba Olimpik apin lama ke udah.

Chairman SIDS Pating Segitin enggau Merdang Gayam, Alice Manggoi madahka kelimpah ari kraf jari, unit nya mega merambu deka ngaga licha pasal pengawa ketuai sereta penemu ungkup kaban serakup.

Bela diatur malam nya, pengawa meri insentif ngagai anak kaban serakup ke mujur ba pekara pelajar, pekit Ratu Kebaya, chabut tikit betuah, lagu spunsa sereta mupu duit nengah sesi ‘Golden Voice’ ti disadaka Gira.

Sama bisi datai bini Gira, Anita, Ketuai Nembiak SDNU Chief Churchill Drem, ti mega nyadi Mandal Chairman SDNU III, Chairperson SIDS pampang Kuching Monica Sita Gaik, Sekretari Besai SDNU Spencer Birai enggau Auditor, Angela Samson; Paderi Gerija St Francis Samarahan Rev Fr Dennis Gimang enggau bala ke bukai.-UB