SIBU: Mensia mayuh mantaika pengaga ba polisi ‘No Tiket, No Entry’ ti diatur ba penyangkai ekspres ai kenyau 1 Mei tu tadi, sebengkah penyungkak pengelikun penumpang ekspres.
Opis Kaunsil Sungai Sarawak (LSS) temegah ati enggau kerejasama ari mensia mayuh enggau orang ti ngempu ekspres.
“Naka ke diatu polisi nya mujur diterima mensia mayuh.
“Nyangka kitai kelalu tumu mantaika pekara tu tang kami melaba deka nemu pemutus polisi tu dalam kandang dua minggu,” ku pemesai LSS William Jinep.
Polisi tu ditengkebang pengudah randau begulai enggau orang ke ngempu ekspres di Sitak Kapit.
Polisi tu mega deka dipejalai ba Kapit, Sibu, Sarikei, Marudi, Limbang enggau Kuching.
Ba polisi baru tu, pengelikun orang ti nepan ekspres deka dijaga kelimpah matau penyalah ekspres ti mai kelalu mayuh penumpang.
Nambahka nya, polisi tu nentuka semua ekspres diberi pas sebedau sida bekejang ari penyangkai.
Pengawa ngerikod penerang orang ti nepan ekspres nyengkaum operasyen baka ngaga sekat ba sungai enggau matau sepemanjai endur ti engkeman mega deka digaga enggau suah agi.
Ba pekara ti bekaul, bala raban penerit adat LSS ditu berengkah kisuk nyaut mensia mayuh betanyaka tiket ekspres.
Sida ti nadai tiket enda tau tama ngagai penyangkai.
Kelimpah ari nya, raban LSS mega dipeda berengkah mayuh datai gawa ba penyangkai ekspres nyengkaum nentuka semua ekspres chukup jaket pengelikun.
Mensia mayuh majak datai ngagai penyangkai ekspres nyerumba pengerami Hari Gawai Dayak ti deka datai.
Nitih penerang media, penyangkai ekspres sebengkah endur pemadu mayuh alai mensia datai ninting maya Hari Gawai Dayak.- BORNEO POST
Reviewed by Admin
on
May 07, 2014
Rating:
No comments: