Pemutus Mawan nya ngemeratka penyerakup

Iya mega ukai bechiping mutuska penemu tang berindik ari peneka ketuai BN menua enggau nengeri

SIBU: Chairman Parti Demokratik Progresif Sarawak (SPDP) sitak Meluan Jerry Clement madah, ulah sekeda ketuai Indu enggau Nembiak SPDP ti ngemendarka undi enda pechayaka Presiden Tan Sri William Mawan Ikom sama reti baka ngelaban jaku ketuai Barisan Nasional (BN) nengeri enggau perintah besai.

Ku iya, nya berindik ari penemu Mawan ke mega Mandal Presiden BN menua nurutka peminta ngambika berakup nitihka polisi kerejasama ti ngemeratka BN.

“Pemutus iya ke deka mutarka penanggul enda patut dikumbai bechiping ati ngujungka parti betapi enggau penanggul baka ke diatu.
“Nya alai, undi enda pechayaka Mawan ti diputuska Ketuai Indu SPDP, Datuk Chiew Yen Chew enggau Ketuai Nembiak SPDP, Robert Ayu ke nadai belalai ngelaban, nya ngelanggar polisi BN.

“Nya mega mandangka Kaunsil Tinggi BN enda tetangkup ke pengawa nyentuk ke seiku Ketuai Indu enggau Ketuai Nembiak, ti enda pegari nama sanggup merambu nengah chara ke teratur mantaika penemu enda pechaya ke Mawan, semina ketegal iya nurutka peminta Chairman BN renggat nasional enggau nengeri ke minta iya nerima baru empat iku pengari rayat SPDP ke ditingkil suba, ngambi pulaika pemaik ngagai BN,” ku iya ditu ensanus.

Ku iya baru, ulah seduai nya udah ngerusak pengelikun parti sereta ngamah lalu ngeruga penegap BN.
“Penemu Ketuai Indu enggau Ketuai Nembiak SPDP ti madahka chara Mawan nerima baru empat iku pengari rayat SPDP nya enda nengah sistem enggau kaunsil, nya enda betul.

“Reti nya, peminta ketuai besai BN mega tau dikumbai enda sistematik sereta mega enda tau nyadika lalau kena ngintu parti enggau kaban parti.

“Peminta ke baka nya ukai pekara ke baru nyadi ba sekeda komponen parti BN di menua tu, kenyau ari Chiew Yen Chiew enggau Robert Ayu bedau diadaka,” pia ku iya.

Enti kitai beratika sejarah kenyau ari SPDP ditumbuh, bepun ari repik Parti SNAP ke alai sebedau tu Mawan kala nerima baru kaban parti tama ngagai SPDP baka dalam taun 2002, ADUN Meluan, Wong Judat ke mega chalun ngatika diri ke menang bepilih napi chalun BN-SNAP Giman Itam.

Pengawa nerima empat iku pengari rayat nya endang amat enda nengah EGM tauka nguna ‘delegates konferen.’

“Dalam pekara tu, SPDP udah setuju nerima baru kaban tama ke dalam parti enda nguna kuasa pengari parti.

“Sekalika pemutus nerima empat iku pengari rayat SPDP nya nitihka atur tauka enda maya nya, nama nadai ninga Ketuai Indu enggau Ketuai Nembiak mantah pekara nya suba.

“Lapa enda mantaika undi enda pechaya ke Presiden bekaul enggau pemutus nerima baru empat iku pengari rayat SPDP nya suba deh?.

“Sekalika pemutus Mawan tauka Ketuai Nembiak nya enda bebatang?,” pikir mih.-BorneoPost