Isu dadah: Perintah enda patut belembut- Wan

KUCHING: Dawa ke nyebut kaban penerit adat bisi besangkut paut enggau pengawa ngidar dadah patut disempulang enggau bukti lalu anang nuduh orang sengapa ngereja pekara ke bansa nya.

Sapit Menteri Dalam Nengeri Datuk Wan Junaidi Tuanku Jaafar madah, nyema kaban penerit adat amat bisi ngereja pengawa ke bansa nyadi sida endang patut diukum ngipakka penyalah diri.

Iya madah, perintah sigi enda belembut ati enggau raban penerit adat ke bisi besangkut paut enggau pengawa ngidar dadah.

“Enti udah bisi bukti, tau bantai lalu anang main tuduh sengapa ketegal deka ngeringka politik diri.

“Kami sigi enda belembut ati nyema bisi kaban penerit adat besangkut paut enggau pekara bansa tu,” ku iya madah ngagai pemberita ditu ensana.

Iya madah munyi nya lebuh dipinta nimbal penemu bekaul enggau dawa Kaban Kunsil Nengeri (ADUN) Ba’Kelalan ke ngaitka bisi kaban polis besangkut paut enggau pengawa ngidar dadah.

Wan Junaidi madah, Sarawak endang antara nengeri ke pemadu mimit ba isu salah nguna dadah.

Ngenang dawa nyebut bisi kes nyadi garis entara menua Malaysia – Indonesia lalu ngujungka pengawa mai dadah enggau chara belalai nyadi ku iya, kebuah bansa nya laban kelalu mayuh ‘lubang chit’ ba garis entara menua sepemanjai 220 kilometer (km)ke ngujungka pengawa bansa nya tau nyadi.

Taja baka nya, ku iya jaku tuduh ke ngaitka raban penerit adat ba garis entara menua ngemendarka pekara nya, tu utai ke enda betul lalu nyema bisi nyadi.

Ayanka bukti. Ba pemansang bukai iya madah, pengawa ngagai Begunan Kastam, Imigresen enggau Kuarantin (CIQ) ba taun seiti nyin ila deka nyadi batang pekara ke dikemeratka Opis Menteri Dalam Negeri (KDN).

“CIQ tu beguna amat dikena nentuka pengawa bejaga ba garis antara menua serekat kelimpah ulih nangkap mayuh agi aktiviti tama enggau pansut enggau chara enda beradat,” ku iya.-BP