Pekebun sawit diperansang nyadi kaban koperasi- Uggah

Enti nyadi kaban koperasi sawit ke dijual berega agi enti dibanding dijual ngagai orang tengah 

SIBU: Orang ke bisi kebun sawit diperansang minta nyadi raban koperasi tauka numbuhka gerempung betanam betupi.

Menteri Pemansang Kebun Dandang Besai enggau Komoditi Datuk Amar Douglas Uggah Embas madah, Opis Minyak Sawit Malaysia (MPOB) udah numbuhka 30 bengkah Koperasi Nanam Buah Sawit.

Koperasi tu ku iya ulih meli asil sawit ke mayuh kelimpah meli buah sawit rega ke besai.

“Pekara tu deka mai penguntung ngagai orang ti bisi bekebun sawit mit enti sida udah nyadi kaban koperasi baka Penanam Sawit Mampan Tongod Sabah, Bera di Pahang, Serian enggau Saratok di Sarawak.”

“Koperasi Penanam Buah Sawit Saratok udah mandangka pemujur ba pekara tu lalu dipeda ulih mai penguntung ngagai orang ke udah nyadi kaban,” ku iya.

Iya mansutka pekara nya maya bejaku ba pengerami Aum Orang Bekebun Mit Sawit Nasional 2014 ditu, kemari.

Uggah madah, ba kandang bulan Januari ngagai Jun 2014, koperasi tu udah meli lebih 300 tan buah sawit sebulan.

Kelimpah ari nya, bala kaban ke nyual buah sawit nengah koperasi tu bulih 15 ngagai 20 peratus rega ke lebih besai enti dibanding enggau rega ke dijual ngagai orang tengah.

“Enti udah masuk nyadi kaban koperasi, sida pekebun mit ulih nyual buah sawit sida ngagai kilang kelebih agi sida ke nadai perengka pengangkut baka luri.

“Nadai lori tauka perengka pengangkut nyadi batang penanggul ke ditapi bala ke bisi nanam sawit mimit. Nya alai MPOB ngasuh numbuh tauka meransang sida nyadi kaban koperasi ngambika pekara tu ulih diputar,” ku tandu Uggah enggau nyemetak.

Nambahka nya, ku Uggah, pekara tu mega ulih ngurangka agi pengawa nyual buah sawit ngagai orang tengah enggau ngurangka agi kes enchuri buah sawit.

Maya berandau enggau pengarang berita sepengudah pengerami nya Uggah bisi madah MPOB udah nganjung surat ngagai kilang enggau orang dagang ti meli buah sawit churi.

“Aku ngarapka pekara tu ulih nyadika lalau ngagai orang bukai,” ku iya seraya madahka MPOB bekerejasama enggau polis mutarka pekara tu.

Iya mega madah, pekara tu mega nentuka pemanah nama nengeri Sarawak bejalaika industri nya.

Nitihka ripot polis, kes enchuri buah sawit dipadahka mayuh nyadi di Sarawak enti dibanding enggau menua bukai.

Bela bisi datai maya pengerami tu iya nya Sapit Menteri Pemansang Kebun Dandang Besai enggau Komoditi Dato Noriah Kasnon, Chairman MPOB Dato Ar. Wan Mohamad Khiar-il Anuar Wan Ahmad, Ketuai Sekretari Opis Menteri Datuk Himmat Singh enggau Ketuai Direktor MPOB Datuk Dr Choo Yuen May. -BP