Ubah Runding Sentang Tanggungpengawa PDRM

 

KUCHING: Anggap mensia mayuh ti madahka Polis DiRaja Malaysia (PDRM) ti semina nangkap orang ti ngereja penyalah aja, nya anggap ti patut diubah.

Kepala Menteri Datuk Patinggi Tan Sri Adenan Satem madahka, raban polis ukai semina bejalaika pengawa nangkap orang ti ngereja penyalah tang bisi tanggungjawab ti lebih besai agi iya nya nyaga pengelikun menua enggau rayat.

“Bekaul enggau tanggungpengawa ke dipejalaika raban polis tu, agi mayuh orang salah anggap iya nya madahka polis semina nangkap orang ti ngereja penyalah aja, tang nya sebengkah ari pengawa sida.

“Ke bendar batang tanggungpengawa polis iya nya raban ti nyaga pengelikun rayat enggau menua,” ku iya.

Adenan mansutka penemu tu lebuh bejaku sereta bejadika Karnival 1KDN, ti diatur Opis Menteri Dalam Negeri (KDN) ba Palan Pengengkah Kereta, Stadium Nengeri Sarawak, ditu kemari.

Kelimpah ari nya, iya mega madahka diri gaga ati ngagai Bajet 2015 ti dibantai Menteri Besai Datuk Seri Najib Tun Razak ensanus, ti ungukupka belanja ngagai PDRM sereta deka nambahka pemayuh raban polis.

Iya madahka nya sebengkah chara dikena ngurangka kes penyalah ngelanggar undang-undang di menua tu, ti nyadi enda ngira siang tauka malam.

“Kemari (ensanus) aku gaga ati ninga Menteri Besai bisi ngungkupka belanja ngagai polis sereta raban polis mega deka ditambah. Tu pekara ti manah, laban enti mayuh agi raban polis kitai ngasaika diri likun agi.

“Tikas penyalah ngelanggar undang-undang di Sarawak agi baruh sereta ulih dijaga, taja pia bisi sekeda kes baka ngerusak reta tengkira,” ku iya seraya ngarapka negeri enggau menua deka majak likun.

Karnival 1KDN nya berengkah diatur 11 ngagai 12 Oktober tu, ti nyendiaka mayuh macham program tauka aktiviti enggau bansal pemandang ari 12 bengkah opis enggau ejensi dibaruh KDN.

Kitai gaga ati sereta beterima kasih ngagai Sapit Menteri Dalam Negeri Dato Sri Wan Junaidi Tuanku Jaafar ku iya, laban ti mai program tu ke negeri kitai. Tu keterubah karnival ti baka tu diatur di Sarawak.

“KDN ke bisi 12 buah ejensi enggau opis nengah program tu ulih ngerapitka kaul enggau rayat, lalu nengah program tu mega kitai ngarapka rayat nemu nama ke bendar tanggungpengawa KDN, ejensi enggau opis ke ari baruh KDN,” ku iya.

Kelimpah ari Junaidi, entara ke bisi datai ngagai pengerami tu kemari bini Adenan, Datin Patinggi Datuk Jamilah Anu, bini Junaidi Datin Sri Feona Junaidi, Ketuai Sekreteri KDN, Dato Sri Mohamad Khalid Shariff enggau ke bukai.-BP