Penyarut ba ruang bilik suah nyadi bepun ari penanggul suntuk belanja

SIBU: Penanggul suntuk belanja diumba penatai pemisi menua enda tentu manah nejuka mayuh nyadi kes belaya ba ruang bilik.

Ketuai Polis Pelilih Sibu ACP Mohammad Kamal Kordi madah, ari bulan September nyentuk Oktober tu tadi bisi 15 iti kes nyadi.

“Kes baka tu nyadi ketegal ti suah suntuk ngujungka laki bini belaya sebedau nyadi kes bukai baka beemba pangan diri.

“Tu ukai semina bepun ari sida ke indu aja tang baka nya mega sida ke laki nyau beirupka ai bisa ketegal deka ngelantangka ati diri.

“Datai di rumah sida mabuk lalu ngujungka belaya enggau pangan diri,” pia ku iya madah.

Iya mantaika penerang tu sepengudah ngemataka pengawa nyuaka penuduk nyadi Ketua Bahagian Siasatan Jenayah Narkotik Daerah (KBSJND) Sibu ngagai ASP Rahim Mihos alai Inspektor Tengku Mohd Faizal Tengku Yeng nyadi pengari (pemangku) enda lama ba penuduk nya sebedau tu.

Rahim bebansa Bidayuh sebedau tu gawa di Limbang.

Kelimpah ari nya, Sarjan Zainal Abidin Abu Naam mega dipadu nyadi pengari (pemangku) Ketuai Opis Polis Sungai Merah nganti Sarjan Japa Unggam ti deka pinchin.

Dua bengkah pengawa tu diatur ba Indu Opis Polis (IPD) Sibu ditu, kemari.

Kelimpah ari nya, Kamal mega madah, kes lenyau motosikal diatu mega bisi nyadi ba rumah diri empu.

Ku iya, di Sibu, berengkah bulan Januari nyentuk 2 November tu tadi, bisi 16 iti kes lenyau motosikal diripot.

“Tebal agi kes tu nyadi ketegal pengilap diri empu.

“Bisi kes ke nyadi ketegal pagar rumah enda dikunchi ngujungka penchuri motosikal muntang tama,” ku iya.

Kamal madah, motosikal bansa Honda suah agi diripot dichuri lalu pechaya mutosikal nya dijual ngagai bansa bukai ti gawa ba kebun dandang besai.

“Nya alai, kami ngelalau mensia mayuh ngambika bela nyaga pengelikun mutosikal kita.

“Polis enda ulih nyaga pengelikun genap iti rumah di Sibu ditu tang kita empu patut bejaga,” ku iya seraya ngelalau mensia mayuh sama ngemeratka pengelikun motosikal nengah chara ngaga kunchi tambah.

Ba pengawa tu, Kamal bisi nyebut kes gian dadah nyadi pengepun penyalah bukai baka ngerumpak enggau nyerungkai rumah orang.

Iya ngarap penatai Rahim megai penuduk nya ulih ngurangka agi kes nya ba pelilih tu.-UB