Projek Nikung, Nagang Tebing Sg Kayan Ari Tusur Begunaka Belanja Besai- Wan Junaidi

LUNDU: Projek besai kena nagang tebing Sungai Kayan, Lundu ari tusur diperambu deka dipejalai dalam timpuh ke semak.

Menteri Pengeraja Asal enggau Rampa Menua Datuk Seri Wan Junaidi Tuanku Jaafar madah, projek nya ila deka mai pemaik ngagai lebih 1,000 peranak ke diau besemak .

“Pengawa nikung kena nagang tebing Sungai (Sg) Kayan tu ari tusur endang sebengkah projek ti besai.

“Projek tu mungkur mayuh genturung pendiau lalu enggai nyadi enda digaga ketegal penanggul sentang pekara tu udah didinga kenyau aku berengkah ngaul diri ditu ba taun 2006 suba,’ ku iya.

Wan Junaidi mansutka penerang tu ngagai pemberita pengudah ngabas palan projek ngaga timbuk batu ngenan tanah tusur di Kampung Pulo Air, Lundu kemari.

Iya ke mega Kaban Parlimen Santubong madah, Direktor Opis Parit enggau Entali Ai udah diasuh ngaga pansik lalu nyendiaka pelin projek.

“Sentang belanja dikena ngemujur projek nya deka diberi ari opis menteri aku empu lalu ketegal nya meh aku berani ngenataika perambu tu.

“Tembu ila,tanah ba sepemanjai nebing Sungai Kayan ulih diseliah ari tusur,” ku iya.

Ngenang projek ke diabas iya kemari, Wan Junaidi madah timbuk patut digaga enggau lengkas ngambi tau nentu lima buah rumah ke diani urung 50 iku orang ke besemak enda dibai tanah tusur maya musin ujan tu.

Ku iya projek ngaga timuk batu nya begunaka belanja RM180,000 lalu deka berengkah digaga ba minggu ti deka datai.

“Kunteriktor udah dipilih lalu projek disadang tembu dalam timpuh lima minggu. Reti nya sebedau ujan ba bulan Disember nyentuk bulan Januari, timuk batu nebing sungai nya patut udah tembu digaga,’ku iya.

“Taja pan penyampau rumah ke kena bungkur penusah tu enda mayuh tang kitai enda sekali ngelakka sida pia aja.

“Tu mandangka perintah seruran deka mutarka semua penanggul rayat,” ku iya.

Kemari mega, Wan Junaidi bisi betemu enggau raban ketuai parti enggau pupu bansa Pelilih Lundu di Rumah Rehat Kerajaan, Lundu.

Bela nyempulang penemuai kereja menteri nya, Direktor DID Ir. Chok Moi Soon.-UB