Adenan nemu ngungkupka penuduk maya PRN11

KUCHING: Agih penuduk ungkup tiap parti dalam komponen Barisan Nasional (BN) Sarawak ba Pengawa Bepilih Besai Kunsil Nengeri ti Ke-11 (PRN11) tu ila bepanggai ba pemintar runding Kepala Menteri Datuk Patinggi Tan Sri Adenan Satem.

Sapit Presiden Parti Pesaka Bumiputera Bersatu (PBB) Datuk Amar Abang Johari Tun Openg madah, iya pechaya atur kena mutarka pekara nya deka dipejalai dikena nentuka pengering enggau penegap kaul BN Nengeri ungkup pengawa bepilih nya endang dikemerat.

Iya mantaika jaku tu rambau ‘Merger of Minds and Hearts Unity Dinner’ ti diatur begulai raban komponen BN Nengeri; Parti Rakyat Sarawak (PRS), Parti Demokrasi Progresif Sarawak (SPDP) enggau Parti Sa’ati Sarawak (SUPP) ujung minggu tu tadi.

Taja pia, Abang Johari enda nyemetak madah sebarang kelai sekalika putar atur nya deka nguntungka tiga bengkah parti nya tauka dua parti ke bukai; Parti Bersatu Rakyat Sarawak (UPP) enggau Parti Tenaga Rakyat Sarawak (TERAS).

Iya tetap ngansak raban parti PRS, SPDP enggau SUPP terus meri sukung rat sereta pengering ngagai raban ketuai diiring Adenan ke lalu nyadi Kepala Menteri ngambika Perintah Sarawak ngembuan kuasa besai maya ” “ngetanka hak nengeri tu dalam langkar kereja Federasyen Malaysia.

“Dalam pengawa bepilih tu ila, aku andal amat, Datuk Patingi Adenan ti ngembuan mayuh peneleba dalam dunya politik sereta nyadi ketuai, deka ngena pemutus ti pemadu engkeman.

“Aku endang pechaya iya ulih ngasuh kita terenah runding lalu ngaga pemutus pulaika penguntung ngagai semua kitai.

Aku ngarapka pemereti runding enggau ati kitai dalam BN (PRS, SPDP enggau SUPP) deka nyadika pengering ba Datuk Patinggi Adenan,” pia ku Abang Johari rambau pengerami makai lemai iya ke diatu ba sebengkah hotel tebilang ditu apin lama ke udah.

Iya sekeda ari raban ketuai PBB nyempulang BN Nengeri sereta Sekretari Besai, Datuk Dr Stephen Rundi enggau Sapit Ketuai Nembiak PBB Gerald Rentap Jabu datai ngulu pengerami makai lemai gerempung Pemereti Runding enggau Ati ke ditumbuh tiga bengkah komponen BN Nengeri dalam bulan Jun taun nyin kemari.

Abang Johari, ke lalu nyadi Menteri Pengawa Berumah Sarawak sereta Menteri Dagang Temuai madahka iya suah meda sekeda pemutus politik kala digaga kenyau ari hari keterubah iya nyadi Kaban Kunsil Nengeri (ADUN) dalam taun 1981 suba.

Ku iya, pekara tu nyengkaum pemutus formula BN-Plus ti udah digaga Kepala Menteri ke dulu suba (diatu TYT) Tun Pehin Sri Abdul Taib Mahmud dalam pun taun 1980-an dikena nentuka nambahka pengari ari raban bansa Dayak dalam perintah sereta ngetanka raban Parti Bansa Dayak Sarawak (PBDS) dalam perintah BN.

“Bekenangka sentang pengari, Datuk Patinggi Adenan ngenggaika pengawa dikereja iya nadai ngembuan pengari China jelan pemayuh,” pia ku Abang Johari, bechuanka raban kabinet perintah BN ke bisi diatu datai ari TERAS enggau UPP, iya ke pambar ari SPDP enggau SUPP.

Kededua parti ke pambar tu mengkang nyadi parti luar ari BN, tang penyandang ari parti tu madah, sida patut ngentanka penuduk diri maya PRN11 tu ila nyadi chalun BN.

Nyerumba nya, PRS, SUPP enggau SPDP nengah Pemerti Runding enggau Ati sida udah manta diri nulak raban parti ke udah pambar tu ngaul BN lalu deka ningkah pemutus ngasuh penyandang dalam parti nya bediri ari baruh BN.

Presiden PRS, Tan Sri Datuk Amar Dr James Jemut Masing madahka penatai bala ketuai PBB nya nyata ngayanka tulang belakang BN Nengeri diatu enggau sida, iya nandu madahka Pemereti Runding enggau Ati nya bepanggai ba atur BN ke nyadi prinsip chuan dalam kod ulah kededua piak ketuai tinggi parti sereta mega ba renggat baruh.

“Nyadi seiku ari raban BN, tu tanggungpengawa ke dipegai kitai dalam BN, semua kitai patut nyaga sereta ngetanka diri ari sebarang keruga munsuh kitai tauka ari sida ke ngambu penuduk kitai ti udah diagihka BN ungkup kitai.

“Nya alai, semua kitai ari empat chabang parti BN di Sarawak ditu – PBB, PRS, SUPP enggau SPDP, ke begempuru ditu baka malam tu, mina ngingatka sebengkah pekara… ngeringka BN dalam PRN 2016 sereta meri sukung ngagai ketuai Datuk Patinggi Adenan Satem, iya nya Chairman BN Sarawak,” ku iya.

Masing mega bisi ngayanka pengandal ati iya BN deka terus megai kuasa merintah Sarawak pengudah pengawa bepilih ila, laban BN Nengeri nadai betapi enggau munsuh ari luar iya ke ulih ngalahka sida.

“Munsuh ke bendar iya datai ari kitai empu. Munsuh nya bisi dalam diri kitai.

Enti sema kitai ulih mutar sereta nawar penanggul kitai empu dalam BN; enti sema kitai ulih ngiarka penangi ati ngagai pangan diri; enti sema kitai ulih ngenataika peminta rayat ngelui ari diri empu, emba ari penyakal nya ukai pekara ke dikenangi laban BN deka ngiring nengeri tu pengudah pengawa bepilih tu ila,” ku iya.

Presiden SPDP Datuk Seri Tiong King Sing mega madah, deka neruska peminta ba penuduk parti iya dalam BN nyengkaum chalun ti deka bediri ba penuduk ke endang diungkupka ngagai parti nya.

Ku iya, manah agi mantaika pekara nya ba mua mensia mayuh, ari ke semina nemu bejaku ba belakang aja, seraya madah, iya empu enda belabanka penemu enggau Adenan rambau aum kaunsil tinggi BN baka sekeda orang tang udah betemu mua ngerandau Adenan bekaul enggau penuduk SPDP ba sekeda pekara.

Presiden SUPP Senator Datuk Dr Sim Kui Hian madahka parti nya seruran taluk ngagai kaban dalam BN kenyau ari penumbuh iya taun 1972 kelia.

Iya mega madahka SUPP nyadi parti menua Sarawak empu deka terus nyukung ketuai Adenan ukai semina datai maya pengawa bepilih 2016 aja, tang deka meri awak lima taun da agi ngagai Adenan baka ke dipinta Kepala Menteri nya.

Rambau pengawa bepilih tu ila, bisi 82 buah sitak deka nyadi kelang nyengkaum 11 penuduk ke baru ti teulihka pemendar ari parlimen.

PBB nyadi parti keterubah madahka diri deka bediri ba lima buah penuduk baru nya, lalu nyentuka diatu mengkang nganti kati penuduk nya deka diagihka ngagai komponen BN Nengeri ke bukai, sekalika UPP enggau Teras deka disengkaumka sekali.-UB