Pengawa nekat ai ba Tekat Ai Bengoh udah berengkah dipejalaika

KUCHING: Projek Tekat Ai Bengoh ti disadang tembu digaga dalam bulan Februari 2016 deka diserah ngagai Lembaga Air Kuching (LAK).

Menteri Muda Perengka Guna Mensia Mayuh (Bekal Ai) Datuk Sylvester Entrie Muran madah, pengawa nekat ai ba palan nya udah dipejalaika pengudah jalai ai sementara ti dikena suba ditutup kena 26 Ogos tu tadi.

“Pengudah nya, ai diatu diperatika udah niki urung 63 meter ari tikas ke patut (penuh) iya nya 80 meter,” ku Sylvester.

Iya madah munyi tu lebuh nyaut tanya ari ADUN Opas Ranum Mina ba Aum Kunsil Nengeri ke -17 Penggal Kedua di Komplek Kunsil Nengeri ditu,ensanus.

Ku iya, ai ti ari tekat ai semina deka dikena maya musin kemarau ti balat nuntung kitai, kelimpah dikena nambahka penyampau ai mata ba loji ai di Batu Kitang.

“Bekal ai mata ari tekat ai Bengoh nadai nanggul bekal ai kitai taja pan musin kemarau.

“Naka kediatu, nadai kebuah ngambi ai ari tekat ai Bengoh laban ai ba Sungai Sarawak Kiba chukup dikena mensia mayuh,” ku iya.

Ku iya, ai mata di Batu Kitang enggau operasyen tekat ai Bengoh udah dikerembaika ngagai penguna ba kandang menua Kuching (nyengkaum Bau-Lundu-Sematan,Sadong Jaya enggau Samarahan) nyentuk taun 2030 ila.-UB