Projek ngemesai jalai nyadi 4 lurung 2 alur ari Bt. 10 nuju Bt. 15 diperengkah kemari

KUCHING: Projek ngemesaika Jalai Kuching -Serian ari Batu (Bt.) 10 nuju Bt. 15 sepemanjai 9.2 KM ke beguna belanja RM80 juta diperengkah, kemari.

Pengawa nganti jalai 2 lurung 2 alur nyadi 4 lurung 2 alur nya dikemujur Menteri Kereja Raya Dato Sri Fadillah Yusuf.

Ba jaku rambau pengerami, Fadillah madah projek nya dikemendar ba Atur Pemansang Malaysia Lumpar Ke-10 (RMK-10) lalu semina ulih berengkah diatur diatu pengudah semua pemar kelebih agi sentang isu tanah diputar.

“Jalai Kuching – Serian ari Batu 15 nuju Serian udah diangkatmanah nyadi 4 lurung 2 alur ba taun 2005.

“Tajapia, jalai ari Batu 10 nuju Batu 15 mengkang 2 lurung 2 alur lalu udah ngujungka pejalai perengka pengangkut suah dedat.

“Pendiau jalai tu ti suah dedat ngujungka kitai nerima mayuh sebana ari mensia lalu pemar tu suah dipetalatka ba media rama,” ku iya.

Pengudah pansik sentang guna ngangkatmanah jalai nya diadu, Fadillah madah projek dikemendar digaga Perintah Besai ba taun 2014 nengah Rolling Plan 4 RMK10.

Iya ke mega Kaban Parlimen (MP) Petra Jaya nambah projek nya mega mungkur pengawa ngaga 5 iti jematan, 5 iti simpang besai, 5 iti ‘U-Turn’ enggau seiti ‘roundabout’.

Projek disadang tembu dalam timpuh 21 bulan iya nya kena 8 Ogos 2017.

Ba aum pengarang berita pengudah pengawa ngelanchar di laman Opis Pengangkut Darat (JPJ) Batu 12 nya, Fadillah madah Projek Jalai Pan Borneo iya nya ba dua pakej keterubah benung dipejalai diatu.

“Jalai ari Telok Melano nuju Sematan sepemanjai 33 KM benung dipejalai enggau manah diatu.

“Pakej ke seiti agi iya nya ari Simpang Nyalau nuju Simpang Bakun pan benung chakah diatur tajapan napi penanggul ba isu tanah. Isu nya mujur diputar Perintah Besai enggau Nengeri,” ku iya.

Fadillah madah berengkah taun 2016, tinda ungkup 11 agi pakej Jalai Pan Borneo deka dikeluar.

Bela datai Menteri Perengka Guna enggau Penyambung Dato Sri Micheal Manyin.-UB